為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 01 月 20 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

明伙Re-U

人生能夠相識超過廿六載嘅朋友,實屬難得,陶大宇、邵仲衡、郭政鴻,仲有退出娛樂圈已久嘅吳啟明,九一年因為《大時代》結戲緣,最近因為後者進軍飲食業,而令「四蟹」得以齊腳Re-U,繼而擔任今次「Paco巨星飯堂」嘅嘉賓。

我同「三蟹」去到明哥位於中環嘅「慢煮兩餐」,品嘗佢用心炮製嘅特色菜式外,佢仲公開下廚秘技,令大家食得更好!

「四蟹」因為明哥(右二)開餐廳而Re-U,大宇(左一)話多得鴻爺(左二)多年來保持與昔日戰友聯絡,加埋邵仲衡,「四蟹」先可以齊晒腳。

 

良心製作

今次老友、酒腳聚首,見到明哥搖身一變成為廚神,真係要了解佢開設呢間精品餐廳嘅心得。「煮嘢食係我最大嘅興趣之一,平時煮俾朋友食,佢哋一定會話好食,我為咗證明一下食物嘅水準,就決定開餐廳,等消費者俾啲中肯嘅意見我,好彩佢哋嘅反應都唔錯。

「我開餐廳最重要嘅,第一係技術,第二係用心,廚房要好乾淨。其中一道招牌菜豉油皇乳鴿,我試過開二開四上菜,都唔及原隻上,完全保留到原汁原味。」

o依家舖租貴、人工貴,間接令材料質素降低,難得有呢位良心大廚,開設呢間隱世小店,令我哋食到有heart又有質素嘅菜式。大宇十分認同:「明哥真係好鍾意煮嘢食,先會咁有心去研究。我睇到佢做自己鍾意做嘅嘢,都好開心。佢另一個招牌菜係溏心鮑魚撈飯,我記得第一次食嘅時候,佢仲好自豪咁話:『你啲蟹仔見到未呀?啲鮑魚黐刀o架!』。

「鮑參翅肚煮得好食,唔算係驚喜,我最欣賞係佢嘅家庭菜,好似老少平安(餐廳菜名為肉碎蒸鹹蛋)、咖喱牛腩,都煮得好出色。」

明哥親自下廚,令我同其他三位嘉賓,喺佢位於中環嘅「慢煮兩餐」,大快朵頤!

 

超過廿六載嘅友情,因為《大時代》開始(上圖),

 

32頭溏心鮑魚撈飯($380/位),選用中東乾鮑炮製,為明哥師承前港督府禦廚鄺炳坤之作。米飯混合來自台灣、中國同泰國米,有飯香又夠煙靭。

 

豉油皇乳鴿($98/隻),原隻侍客保留原汁原味。

 

蟹仔力讚

鴻爺同樣欣賞明哥出品,「蒸水蛋好嫩好滑,仲有煎馬頭魚,全部都食到久違嘅『家的味道』。」

邵仲衡就表示:「明哥嘅豆豉鯪魚油麥菜,係我食過之中最惹味嘅,令我更加欣賞佢落咗咁多心機落去啲菜式度。」

一眾兄弟都咁捧場,明哥就親解箇中奧妙。「大宇講嘅牛腩,我除咗研究個咖喱底,仲會用埋啤酒,令牛腩嘅texture更加彈牙;鴻爺講嘅蒸水蛋,雞蛋同高湯嘅比例係1:1,蒸之前我再用過濾器,隔走啲沈澱物,咁啲蛋蒸出嚟就更加滑。

「老六(邵仲衡)鍾意嘅豆豉鯪魚油麥菜,最重要係唔好用罐頭入面啲豆豉,我就揀咗啲靚豆豉,用蒜爆香佢,出嚟就會更加好食。」

踏入2019年,大宇話希望兄弟、好友身體健康,鴻爺就表示希望好過2018。除咗餐飲事業,一向醉心音樂嘅明哥,仲為由李棟旭主演嘅新韓劇《觸及真心》,創作配樂歌曲;邵仲衡就話,希望幾兄弟加埋「老竇」秋官,可以有新嘅作品見觀眾,我都相當期待。

 

餐廳嘅秘密武器之一,係每日新鮮熬製嘅雲腿高湯。

 

明哥即席示範番茄上湯炒蛋,材料除番茄、蛋、蔥段,仲有佢嘅秘製高湯。

 

番茄上湯炒蛋($90),佢表示蛋要炒得有嚼勁,先配合到較腍嘅番茄。

 

以大火令番茄吸收高湯精華,明哥話高湯令菜式嘅味道層次更豐富。

 

煎焗馬頭魚($160),選用較細嘅馬頭魚,肉嫩骨少。

 

咖喱濃湯牛筋腩($140),牛腩既入味又彈牙。

 

肉碎蒸鹹蛋($80),加入蛋白蒸煮,嫩滑美味。

 

公開秘技

哈哈哈!明哥用心用技術炮製菜式,仲為咗今次飯敍做晒功課,「Paco,你有『麵神』之稱,我見到你喺世界各地都一定要食麵,我為你準備一道麵食,叫火焰香蔥撈麵,要即整即食,因為個秘製豉油汁,喺上枱前先加熱,提升味道。」

食而優則煮,明哥對飲食咁有研究,並非一朝一夕,大宇爆料話:「以前我哋開工,放飯嗰陣明哥一定唔食飯盒,佢寧願趕啲,揸車去酒樓或者餐廳食,佢對飲食嘅要求好高o架!」

大宇仲講到之前擔任我嘅嘉賓,品嘗過大廚為我即席炮製嘅炒即食麵顯功夫,明哥又有秘技分享。「我煮即食麵要預早一日準備,因為我會用冷凍技術,令麵質爽到不能再爽。先淥咗個麵餅,腍咗就澇起,然後放入雪櫃雪一晚,隔日拎出嚟先再煮嚟食。呢個做法喺屋企都做到,而且炒嘅對比更加明顯,爽好多o架。」

廿六年下來,「四蟹」各有閱歷,難得仍有機會聚首,所以佢哋都表示要定期搞gathering。

 

小辣羊肉鍋($180/鍋),惹味!

 

火焰香葱撈麵($98/位),麵條配海量香葱,加上經加熱嘅秘製醬汁(左圖),份外滋味。

 

 

 

慢煮兩餐
地址:中環九如坊12號地下
電話:26868101