為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 01 月 13 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

好運迎金豬

即將踏入豬年,係時候開開運,所以今次「Paco巨星飯堂」,我就特別請嚟堪輿學家李丞責,預言豬年大運。佢表示豬呢個生肖適應力強,而且公平、公正帶犧牲精神,所以呢一年,係適者生存嘅一年。

我帶丞責同埋演員馬志威(Edward),去到位於銅鑼灣嘅「隨變燒烤麻辣雞煲」,品嘗出色嘅川味,慢慢指點迷津,齊齊行住運過金豬年!

有丞責贈言,我相信Edward喺金豬年嘅事業發展,將會更見順遂。

 

動作片大吉

講到豬,丞責就話:「唔好以為豬就代表懶惰,其實豬好特別,就算家豬去到野外,都自然會生出獠牙,變成野豬。從玄學角度睇,豬係適應能力高同多變嘅生肖,而且公平、公正,有犧牲精神,所以呢一年會好似豬咁適者生存,或者靈活性高嘅人,適應度會有更大嘅進步。我諗對任何人士、任何行業,都係一個考驗。」

由於娛樂圈屬金、火嘅行業,丞責提到去年(狗年)遇到一個大問題,「狗年嘅二黑星去到西位即兌位,兌字其實係稅啱啱冇咗禾字部。而二黑代表神秘、疾病同奇怪,同稅項風波好有關係。但來年(豬年)嘅西位(兌位)係代表天朗氣清、解決問題,所以積存咗一啲誤會同阻礙,都得以解決。

「不過,因為南位屬火,代表火嘅行業,而三碧星去到南邊,好特別咁代表主戰,所以拍戰爭片、打鬥片或者爭執片、警匪片都會較吃香同被重視多啲。由於三碧存在爭拗性,可能各行各業有比較同競爭,希望係良性嘅競爭啦。」

我同兩位嘉賓,去到位於銅鑼灣嘅「隨變燒烤麻辣雞煲」,品嘗出色又正宗嘅川味,暢談金豬開運秘法。

 

丞責新作《豬聯璧合》,除咗普通版,仲有連同玄學擺設嘅限量行運禮盒裝,可謂特別珍貴。

 

乾鍋海中蝦($338、右圖)同乾鍋醬汁雞($198),全部即叫即炒,原汁原味之外,仲贈送精選湯底,令客人品嘗過四川味道後,又可享用傳統火鍋之味。

 

 

 

夫唱婦隨($58),為金錢肚牛舌,麻而不太辣,佐酒一流!

 

兔、牛啓示錄

我屬兔,丞責特別提點:「豬、羊、兔係三合,三合合成木局,一般嚟講,對八字缺木嘅人更加好,尤其係五行用到木。我知Paco啱用綠色,咁即係三合又得到木,凡事會有救星。另外又有三台星,好有機會喺頒獎台上攞獎,應該代表票房成績。仲有將星,代表拍戰爭、武打、將才嘅戲特別好,但亦都辛苦,因為將領所負擔嘅責任都唔少。

「因有飛符、年符,飛符代表小是非,年符係今年要解決嘅事。另有官符、五鬼,屬兔人士做法律行業當然好,否則我建議你拍與法律、律師同告狀有關嘅電影。健康方面則要注意喉嚨、氣管同筋骨、腰椎等問題。」

至於八五年出生嘅Edward,近年就專注拍動作電影,丞責話:「農曆七月出世,係秋收嘅牛,牛嘅賺錢能力強、實踐能力高,只要方向定位啱,無論幾辛苦都會成功。健康方面,就要特別小心刀劍利器,仲要保護氣管、聲線同喉嚨。」

對於豬年,丞責表示呢一年會好似豬咁,適者生存,而靈活性高嘅人,喺適應力上會有更大嘅進步。

 

丞責即席為Edward測字,為佢指點迷津。

 

A5和牛($688/200g),肉同脂肪分布均勻,入口即溶。

 

巴山凝雨($45),為涼拌隨變粉,麻辣香料為老闆娘嘅家傳秘方,味道只此一家。

 

酸菜桂魚煲($338),桂花魚嫩滑,帶微辣嘅湯底,更能突出魚肉鮮味。

 

隨變麻麻辣雞煲($198/半隻、$258/一隻),以秘方炮製嘅麻辣製作,味道令人一試難忘。

 

測字睇前程

除此以外,丞責再補充:「另有唐符入命,唐符代表創造力和思考性,一般人容易有煩惱和失眠,導致緊張。所以,你可以將心機同用瞓唔着嘅時間,創作啲新動作。

「想拍拖或未拍拖都好,豬年有月煞,就代表好易遇到惡女,如有女朋友要盡量遷就多啲,農曆七、八、九月特別易吵鬧,所以呢幾個月,最好出門旅行輕鬆吓,或投身工作忙啲、分隔兩地自然拗撬都少啲。」

講到Edward適合演咩類型嘅角色較易上位,丞責就跟他即場測字,Edward寫了個「賢」字。「測字通常睇字嘅架構,分開嚟睇可以係『臣又見』,臣解君臣,問演咩戲好?現代嚟講係警匪片,古裝就指君臣嘅戲,會演完又演無限復活嘅。如果當『貝』字睇,即水生動物,由於農曆十、十一同十二月屬水,呢段時間會有較多機會;而『貝』亦代表錢,表示拍呢個戲種會令你搵到錢。」

Edward可塑性高,加上近年積極喺動作上嘅訓練,令佢準備好應付唔同嘅挑戰。

 

Edward(右二)有份演出韋家輝(左五)新作《神探大戰》,向影帝劉青雲(左四)學習。

 

燒聖子王(時價),鮮甜味美。

 

燒白鱔($45/串),皮脆肉香。

 

燒牛舌心($48/串),選用牛舌最嫩滑部位製作,厚切令口感更豐富。

 

隨變燒烤麻辣雞煲
地址:銅鑼灣登龍街18號V Point 23樓
電話:28912787、63773382