胡鴻鈞急遮「咖喱雞」

近期備受無綫力捧嘅胡鴻鈞（Hubert），唱盡多齣劇集插曲、主題曲，仲喺周日劇《救妻同學會》擔正做埋「男一」，氣勢如虹。貴為紅人，一舉一動、少少嘢都畀人留意，所以做乜都更加要打醒十二分精神。

日前，Hubert出席一個公開活動，東姑除咗發現佢着住G-Dragon都有對嘅「Balenciaga Speed Trainers」襪套波鞋，鬼咁潮之外，頸上仲驚現一撻疑似「咖哩雞」嘅紅印。當時佢就解釋，因為近來肩頸痛，所以沖涼時自己按摩吓，點知用力過度抓傷咗。不過，傷喺咁敏感嘅部位，難免惹人誤會。

而活動完咗後，佢即刻變番低調，笠晒口罩揸車走人，好似專登避人耳目。咁又係，經常畀人留意（目及）到實，真係唔多自在喇！

東姑「一眼關七」，一嘢就（目及）到Hubert頸上撻紅印，睇落真係幾似「咖喱雞」。

平時畀人評頭品足嘅Hubert，放咗工即刻笠晒口罩掩人耳目，而疑似「咖喱雞」就着褸先遮到喇！

緊貼潮流嘅佢，跟G-Dragon買咗對「Balenciaga」襪套波鞋，價值六千大元。