吳偉豪NG賣萌詐嬲

無綫處境劇《愛•回家之開心速遞》深受網民熱捧，劇中唔少角色漸漸冒起，開始被觀眾認識，其中飾演大學四子嘅吳偉豪（朱凌凌）、周嘉洛（金城安）、馮子森（傻強）同埋焦浩軒（阿壯），貼地得嚟好有親切感，有親切感得嚟又好搞笑，成為劇中最年輕嘅主綫。

早前，東姑就喺電視城嘅canteen，遇上吳偉豪同周嘉洛為《愛》劇開工，場景扮係大學飯堂，佢哋正喺度商量課外搞生意賺外快。由於一大朝早拍攝，趁幕後未擺好機器，吳偉豪乘機食埋個早餐。佢仲好乖巧，一邊聽導演講解，一邊大啖大啖狂隊麵包，食得好猴擒，似係慌死阻慢拍攝進度咁。

不過，到正式拍攝時，受到現場環境有唔少真食客，發出嘅噪音影響，搞到吳偉豪頻頻分神，講對白猛食螺絲，一個shot不斷NG好幾次。東姑所見，佢有感自己「累街坊」，都顯得好尷尬吓，除咗擺出一臉好無辜嘅樣，仲詐嬲「賣萌」添。睇嚟，台前幕後都畀佢嘅「萌樣」俘虜晒，仲邊有人捨得怪罪佢呢？

未埋位前，吳偉豪狼吞虎嚥，快快趣食早餐，醫飽咗肚先。

現場見吳偉豪同啲幕後人員打成一片，似乎幾識跟同事打交道。

吳偉豪同周嘉洛（安仔）做對手戲時，頻頻食螺絲，表情尷尬仲以笑遮醜。

咬住飲管喺度作狀扮嬲嘅吳偉豪，呢個表情應該迷死唔少女粉絲。

擺出一臉無辜樣嘅吳偉豪，萌到冇人捨得怪佢。