邵珮詩晒長腿冧仔

一四年嘅三料冠軍港姐邵珮詩（Veronica），當選四年事業發展平平，拍劇都係演閒角，數到戲份較多，已經係幾年前嘅《愛•回家之八時入席》飾演嘅「欣欣」。不過，佢就畀唔少觀眾狠批演技唔掂，兼有把「雞仔聲」。

早前嘅入夜時分，東姑就喺銅鑼灣發現邵珮詩，見佢着住一條短褲，加一對長boot，顯得佢對腳零舍修長，而佢就邊行邊講住電話，一臉冧滋滋，兼心不在焉到連紅燈都唔睇，亂過馬路。

東姑所見，佢手度揸住支洗頭水，然後徒步行去禮頓道一棟舊式大廈，好熟路咁自己入閘上樓。據知，身為維他奶後人嘅佢，同家人住喺跑馬地，而佢呢兩年就同一個高大威猛嘅圈外男仔蜜運中，斷估佢春風滿面，又騷晒腿扮到靚靚，應該都係上樓同男友仔溫馨過二人世界，就算事業失意，起碼都有愛情滋潤啦！

着住一條超短褲襯一對長boot嘅邵珮詩，顯得一雙美腿特別修長，離遠都好吸睛、好省鏡。

邊行邊冧滋滋似係同男友煲電話粥，邵珮詩傾到忘晒形，連紅燈都照過馬路。

拎住支洗頭水嘅邵珮詩，上咗一棟舊式大廈，懷疑呢度係佢男友個竇。