為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 01 月 10 日

陳錦鴻大發偉論噴口水

停工五年冇拍劇嘅陳錦鴻,早前復出接拍ViuTV新劇《婚內情》,劇中佢飾演一個已婚畫家,同鄧萃雯(雯女)結婚多年,但就背住老婆不斷出軌,而鄧萃雯又會同後生靚仔、飾演醫生嘅林德信發展婚外情,關係七國咁亂,亦可預期兩個好戲之人合作,隨時演技大爆發!

早前,東姑喺荔枝角饒宗頤文化館,遇到佢哋正為《婚》劇開工,趁中場小休時間,一班演員走出戶外唞吓氣。大家圍埋傾偈,錦鴻就好似「大師」上身咁,手舞足蹈喺度發表偉論;而後生演員個個都聽到津津有味入晒神,似乎好崇拜佢。

東姑所見,就連「視后」雯女,都畀錦鴻吸引咗埋去,聽佢猛噴口水。雯女演技當然唔使懷疑,不過,東姑聽聞佢戲外成日請教錦鴻,關於老夫老妻點樣相處同埋有乜生活細節咁,等佢投入「人妻」嘅角色入面。皆因佢現實中未婚,而錦鴻就同杜雯惠結婚十四年,婚姻體驗肯定豐富過佢,難怪佢都要聽錦鴻開talk啦!

另一日,東姑喺尖沙咀一間酒吧,再遇錦鴻開工,呢日得佢一個人做獨腳戲,冇機會畀佢再發表偉論,加上場地係夜蒲嘅地方,對於「好好先生」少去夜店嘅佢嚟講,對住張Beer Pong枱,似乎好陌生都唔知搞邊科,惟有乖乖聽幕後工作人員講解喇!

愈講愈興奮嘅陳錦鴻,之後更講到手舞足蹈,就好似佢個人talk騷咁,大發偉論。

 

就連雯女都畀錦鴻吸引住,好留心咁一味聽佢講。

 

年輕演員好似聽佢訓導咁嘅樣,而雯女個表情,都好似好認同錦鴻喎!

 

出名「好好先生」嘅錦鴻,對於蒲吧好陌生,惟有聽吓工作人員講解,面前張Beer Pong枱點玩。

 

拍完酒吧外景,錦鴻就孭埋背囊、拎住環保袋急急腳收工走人,相信又係趕返屋企慰妻同照顧囝囝。不過,佢趕得嚟唔係好守規矩,行出行車嘅馬路,相當之牙煙。