為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 01 月 12 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

魔童變身Mall王

早排屋企要換電視,我見太座經常網購日用品,就上間網店睇睇,一打「平面電視」出咗成六百幾款產品畀我揀,唔怪得o依家屋企大小用品好多都係網購返嚟。

咁啱同HKTVmall創辦人王維基(Ricky)做訪問,當然要同佢傾下網購嘅新趨勢。Ricky果然敢言,第一句就直指香港零售業仍然停留喺傳統想法,落後於歐美甚至內地。佢一向有橋王之稱,仲記得當年做長途電話回撥,之後光纖寬頻,都為行業帶嚟顛覆式變革,得到「電訊魔童」嘅外號。雖然其後嘅香港電視未能攻佔免費電視陣地,但佢即時轉身做網購平台,似乎魔童想變身Mall王。

Ricky發展網購平台係睇準手機普及同埋時下風氣,香港人每日用手機至少三至四個鐘,年輕一代更偏向喺手機購物。現時平台上有二千幾間商店,展示超過十七萬件產品,建立咗一個「咩都有」嘅印象。貨品多加上推廣,令每日瀏覽率升至二十萬,二○一八年五月開始每日訂單量超過一萬張,即由瀏覽轉化成購買比率約百分之四至五,按年上升一倍。至於重複購買除咗靠瀏覽率,仲要靠配送贏口碑,同埋新穎有效嘅網上展示。好似超市產品係HKTVmall主打,喺呢度做其他產品展示最有效,根據公司統計,客戶買緊超市產品時見到展示有近四成買埋美容和健康產品,兩成四同時買咗電器家品。

如果生意好做,點解大財團唔加入戰陣?老實講,財團嘅人力同其他資源都更充裕,但Ricky認為大企業嘅利益關係複雜,牽一髮動全身,而且較難接受新事物,發展網購反而受到限制。好似HKTVmall呢類新加入者就憑住更大彈性,可以迅速回應客人要求,唔會有大財團嘅包袱,專注度出最理想嘅方案。

傳統超市個個禮拜喺報紙大賣廣告,網購係新經濟事物,點解Ricky選擇喺傳統電視台落咁多廣告?佢認為正正因為唔同channel,先可以幫佢哋接觸到唔同類型嘅客人,增加曝光率。電視廣告見到成效,佢亦加碼投放,所以大家近排成日見到Do姐。當然,公司亦有用數碼平台去接觸年輕客戶,雙管齊下。

睇返公司最近期嘅一八年六月止中期業績,平均每日訂單由一七年同期五千一百張增加至八千九百,合併獨立客戶由十四萬幾增至四十幾萬,訂單總商品交易額增八成至八億一千六百萬港元(下同),營業額按年升近九成一至三億八千九百萬元。網購生意以量取勝,不過公司生意做大咗,仍未能扭虧。公司中期虧損擴大至約一億四千萬元,橋王又點拆?Ricky認為首先都係要由控制成本出發,倉儲、執貨、包裝、配送,以至行銷客服,及財務員工等,都要好好調控。另外亦要不斷革新,好似經營網購平台最大成本係執貨系統,Ricky就將佢由人手轉為全面自動化,希望能降低成本。

Ricky熱愛創業,因為鍾意諗方案解決困難,所以往往捨易取難。