兄弟飯團
民以食為天，你話幾好兄弟，美食當前，自然令兄弟幫更好感情！今次「Paco巨星飯堂」，就請嚟TVB節目《兄弟幫》監製謝英偉（Kent），率領佢嘅兄弟姊妹：陳國峰（Penny）、謝東閔（Brian）同鄧以婷（Irina），喺自己嘅主場「星Club食堂」，暢談2019年嘅新動向。
我一向支持隱世小店，2019年嘅第一期，我就品嘗一下Kent糅合港式、日式嘅食材同烹調方式，炮製獨有嘅美食。
監製Kent（右二）製作唔少同美食有關嘅節目，而Brian、Penny同Irina（左至右）都主持過佢嘅作品，四位都自稱以食為先，見到佢哋就一定有食神。
精采十年
Kent為TVB炮製《廣州闖蕩》、《搵食飯團》同《兄弟幫》等有特色嘅綜藝節目，除咗為新一代演藝人提供磨練嘅機會，Kent都對美食充滿誠意。
「之前都有同Penny，加埋一啲朋友開拉麵店，而呢間餐廳提供嘅菜式，就再廣泛啲，串燒、飯麵都有，每個菜式我都想有少少fusion色彩，特別係個金蠔拉麵，我專程喺流浮山入啲高質素嘅金蠔，100%香港製造，夾埋拉麵嘅效果好好，亦都令人記得流浮山。」
Kent設計菜式嘅配搭，好似佢製作節目一樣咁用心，佢其中一個作品《兄弟幫》，喺2018年就慶祝過十周年，成為另一長壽節目。「十周年嘅時候，我就搵番第一代嘅主持人，阿Bob、MC Jin（歐陽靖）同William（陳偉霆）拍咗個紀念特集。佢哋o依家都係大忙人，可以抽到時間出嚟已經好難得。踏入2019年，我就梗係希望觀眾繼續支持，令節目可以再長壽啲。」
現役《兄弟幫》主持之一Penny，早前就同其他「兄弟」，為節目準備咗特別嘅禮物。「我哋搞掂就會公開俾大家，呢個project講就講咗好耐，但係因為各有各忙，一直都未實踐，啱啱早排我哋終於都夾到時間，於是就真係聚埋做番啲嘢。」
今次我去到Kent嘅主場「星Club食堂」，品嘗集港、日特色嘅美食。
去年「十歲」嘅節目，難得地搵齊第一代主持，拍攝特備紀念集。
星Club豬仔骨（$58/件），外脆內juicy。
流浮山金蠔湯麵（$68），係Kent特別引入流浮山金蠔去炮製，飯敍當日我仲試埋香煎金蠔，相當鮮香。
有Heart音功
一個節目播足十年，當然係難得，而Penny入行十年，都係難能可貴嘅。為咗呢個別具意義嘅紀念日子，佢特別自資舉行音樂會。「我同Brian都係《超級巨聲》出身，不過咁多年嚟都比較少做同音樂有關嘅嘢，雖然做主持、拍劇都令我哋發揮到其他嘅才能，但係我對音樂嘅心，仍然冇變過，所以我想借音樂會，去話俾大家知，我仲係好鍾意唱歌。
「期我都攞埋o架嘞！4月喺麥花臣！雖然o依家仲喺初步階段，但我已經mark緊啲好兄弟嘅期，Brian、坤哥呢啲一定唔少得，仲有好多仲夾緊期，到時要佢哋同我一齊jam歌！」
哈哈哈！聽到Penny點名，Brian即刻話：「一定將個期留番俾你！」
即將於四月舉行首次個人音樂會嘅Penny，不忘着Kent要支持一下。
Penny不時喺IG晒天倫樂，佢嘅囝囝「峰之子」萌爆，更加吸Like。
Brian（右）係「電玩王子」，熱愛打機嘅佢，去年仲獲邀去玩《FIFA2019》，最近佢有份主持嘅《電競王》，寓工作於娛樂。
西京銀鱈魚（$88/件），香滑味美。
星Club厚切牛舌（$55/4件），將牛舌厚切，令口感更rich。
金菇牛肉卷（$32、前）同豚肉芝士露筍卷（$32、後），互相輝映。
雙線發展
而近排以《電競王》見觀眾嘅Brian，啱啱先拍完重頭劇《殺手》，同兩大視帝黎耀祥、陳豪合作。「八年前啱啱入行嘅時候，我就係同祥哥合作，每次同佢合作，佢都教到我好多嘢。而且我喺呢套劇入面，要應付好多動作場面，對我嚟講係一個大挑戰。
「2019年我就希望觀眾繼續支持《電競王》，仲有我有份演出嘅其他劇集，今年都會陸續見街。」
至於萬綠叢中嘅Irina，係《搵食飯團》嘅現役團員，佢表示：「主持咗呢個節目之後，我對美食嘅概念都唔同咗，好多人覺得美食會好貴，但其實有唔少都好似呢間餐廳咁，既貼地又有質素，我希望喺新一年，介紹更多呢類型嘅餐廳俾觀眾！」
踏入2019年，Brian將喺劇集中，向觀眾展現唔同面貌；Irina就會主力主持美食節目，累積經驗。
《殺手》係今年嘅重頭劇，Brian喺劇中戲份僅次於黎耀祥同陳豪，潛力無窮。
因為主持節目，令Irina無論去到邊都特別留意當地美食。
燒芝士年糕（$30），煙靱嘅年糕包住流心芝士，外脆內軟。
豬軟骨定食（$48），豬軟骨炆得入味，令人回味。
星Club食堂
地址：深水埗福榮街218號美居中心地下64號舖
電話：39967474、98533166（WhatsApp）
