尹詩沛髮夾歎煙

無綫藝人尹詩沛，凈係講個名大家未必認識；其實，入行八年嘅佢，參與過唔少劇集，大家一定認同佢熟口熟面。好似憑佢一副好歌喉，就曾經擔任李思捷主持嘅節目《今晚睇李》裏面，「Palwerful band」嘅和音之一，早前播出嘅劇集《再創世紀》，佢就飾演刁蠻任性嘅富二代「Lily」。

早前，東姑喺尖沙咀撞到尹詩沛，佢正為田蕊妮擔正 嘅新劇《她。她。她的少女時代》開工。貫徹佢巴渣潑辣嘅外型，睇嚟佢今次又喺新劇裏面，扮演惡啃寸寸貢嘅角色。當日，佢就喺後巷拍攝一場煲煙戲，竟然招積到攞個髮夾代手指擔煙，而表情仲擠眉弄眼成個「八婆」樣咁，演到入型入格，真係佩服佢！東姑所見，佢私下並非煙民，夾住支煙純粹為角色需要；佢仲覺得個道具「煙夾」好新奇有趣，空檔時向工作人員揮動攞嚟開玩笑。

早前喺《再創世紀》飾演任性富二代嘅尹詩沛，再喺《她》劇扮演「八婆」角色，擠眉弄眼、面目可憎，真係演到入型入格。

見佢用個髮夾代手指夾住支煙嚟食，相當招積吓。

私下似係非煙民嘅佢，都覺得髮夾食煙好新奇有趣，四圍撩人埋嚟睇吓、望吓。