為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 01 月 03 日

陳煒答謝胡定欣教路

無綫嘅《萬千星輝頒獎典禮》曲終人散,視后寶座最終落喺李佳芯手上。賽前大熱兼被捧為「民選視后」嘅陳煒(煒哥)失落大獎;不過,佢就攞番個「最受歡迎電視女角色」獎。頒獎禮後,佢為咗感激粉絲同大班好友嘅支持,日前仲擺咗場慶功宴,宴請《宮心計2深宮計》嘅台前幕後。

好奇怪,喺《宮》劇入面同佢鬥生鬥死飾演皇后嘅胡定欣,點解冇喺慶功宴上出現嘅?其實,以煒哥同定欣深厚嘅交情,佢一早私下請咗對方食飯。早前晚上約七點,東姑就喺尖沙咀巧遇煒哥。當日,佢同埋助手一早入座一間中式酒家,似係好焦急等緊朋友。冇耐,就見到身穿大紅色衫褲嘅定欣,大搖大擺狀甚招搖咁嚟到,原來佢哋相約一齊食晚飯。

東姑所見,煒哥對定欣好殷勤,坐低就攞住菜譜問佢想食乜,菜上枱之後又猛幫定欣挾餸,招呼周到。席間,兩人表現老友鬼鬼,好傾到雞啄唔斷,不時仲交頭接耳密密斟。相信定欣呢個前視后經驗咁豐富,喺頒獎禮前教路煒哥點爭獎之餘,兼幫煒哥拉咗唔少票。雖然,煒哥最終失落視后,但贏番個「角色」獎,算係冇咗個「橙」執番個「桔」,難怪要專誠單對單請定欣食飯,以答謝對方喇!

失落視后寶座只能攞到「最受歡迎女角色」獎嘅陳煒,上台攞獎時一樣心情激動,仲感動到淚流滿面。

 

着到成身火紅色嘅定欣,非常惹人注目,原來約咗煒哥飯局,不過就姍姍來遲。

 

定欣一坐低,煒哥就好殷勤遞上菜譜畀佢睇,等佢點餸。

 

前屆視后定欣,相信喺頒獎禮前傳授咗唔少爭獎經驗畀煒哥,難怪煒哥請食飯答謝。

 

佢哋密密斟有講有笑,而煒哥仲不時挾餸畀定欣,似係好感謝對方指點,兼幫手拉票。