為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 01 月 05 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

老陸遊記

我哋嗰一代出門一次係人生大事,為玩而外遊更加唔使諗。我第一次出外旅遊係喺一九七六年,目的地並唔係時下大熱嘅日韓台泰,而係新西蘭。唔好誤會我廿幾歲就有錢去旅行,其實當時在滙豐實習,最後要調派去一個海外分行工作半年至可以正式做Officer。我被派去瓦努阿圖,完成實習後就用張回程機票經新西蘭返港,於是留低兩個禮拜展開人生首次旅行。

當時冇旅遊天書,當然亦冇Google Maps同旅遊apps,我到埠後就參加一個灰狗旅行團,匆匆走勻南北島,驚嘆新西蘭真係靚絕南半球,諗住第日一定要再返嚟,點知竟然等到四十二年後嘅二○一八年至重遊舊地。剛過去嘅十二月,我同一班朋友再次踏足新西蘭呢個人間天堂,景色依然咁靚。

其中皇后鎮(Queenstown)雖然比較商業化,但旁邊有瓦卡蒂普湖(Lake Wakatipu)同被風景秀麗嘅山脈圍繞,感覺仍然自然寧靜。皇后鎮喺十八世紀因為發現黃金,吸引大量淘金者前去而聞名。呢度係旅遊熱點,活動好多,好動嘅可以去行山滑雪,我哋就選擇坐船遊美福峽灣(Milford Sound),輕鬆嘆靚景。

不過兩次行程令我感受最深嘅,係親眼目睹氣候暖化對我哋嘅影響。好似新西蘭全境最長嘅塔斯曼冰川(Tasman Glacier),四十二年前我去到時冰雪鋪天蓋地,一落車就一路行上去,一片白色世界。今次再去見到冰川已經退到半山咁滯,要坐小型快艇到其中一個冰川腳。據當地人講,過去三十年間塔斯曼冰川嘅冰已經退咗三分一,如果地球繼續暖化,到我孫仔孫女嗰代嚟到唔知仲剩番幾多?可惜我當年影嘅相已經搵唔返,唔可以同今日做個對比。

清末劉鶚寫《老殘遊記》,借遊歷抒發家國感情和政見,我呢篇《老陸遊記》就講下環保。大家去新西蘭旅遊會覺得環境好好,但其實除咗冰川融化,呢度仲面對不同環境問題,好似野生動物喪失棲息地、森林砍伐、汽車空氣污染以及土壤侵蝕等。

面對氣候變化和環境問題,新西蘭喺一九九一年已經通過資源管理法案,係當地管理環境最主要嘅法例。二○一八年,政府推出歷來最「綠」嘅預算案,其中包括用一億紐元(下同,約五點三億港元)啟動綠色投資基金,並且由公共交通入手,預算用六點二億元(約三十二點七億港元)起輕鐵連接奧克蘭CBD同機場,以及單車徑、行人路等。新西蘭亦有專門嘅保育部門負責保護同恢復物種、土地同文化遺產,政府預留六億元(約三十一點六億港元)預算推動綠色項目,其中一點八億元(約九點五億港元)撥俾保育部門。

政府有推動,市民環保意識亦提高咗,咁新西蘭嘅環保表現如何?耶魯大學每年對百幾個國家進行評分,二○一八年嘅報告中,新西蘭喺一百八十個國家地區之中排十七位,環保表現指數七十五點九六,比較第一位嘅瑞士係八十七點四二,仲有進步空間。

陸叔相隔四十二年重遊新西蘭皇后鎮。