俗語所謂嘅「七年之癢」，又多一位人辦嘞！有七年未喺紅館舉行個人演唱會嘅鄭伊健，將於明年二月再次踏上舞台開Show。

今次「Paco巨星飯堂」，我就同伊健去到位於尖沙咀嘅「唐人館」，品嘗高質素嘅中菜，細說佢一搔「七年之癢」嘅興奮。

二月開Show，但伊健已密鑼緊鼓籌備，不過佢話：「唔公開得太多，我要保留番啲神秘色彩，唔係到時點會有驚喜呀？」

友情班底

伊健今次嘅紅館演唱會，名為《Along with Ekin Live Concert 2019》，佢話：「到一九年，我就有七年冇喺紅館開過個人演唱會，中間當然有同其他『古惑仔』開show，但係感覺始終係唔同嘅。我有好多粉絲係支持咗我好多年，今次我想同所有入場嘅人開party。」

除咗粉絲係多年不變，伊健同佢嘅團隊，都係合作經年嘅好夥伴。「呢個演唱會，成果唔係我一個人，係團隊嘅。由我第一次喺紅館開演唱會，到今次嘅班底，都係同一班人，如果有是但一個唔得，我都唔會做，呢個亦都係我隔咗咁多年先再開show嘅原因。」

講到伊健嘅班底，由監製、創作總監、音樂總監等，全部都係同佢並肩作戰多年嘅好兄弟。「監製係肥仔錢國偉，創作總監就係朱祖兒，音樂總監係陳光榮。為咗演唱會，本來陳光榮寫咗一首新歌，但係後來佢同我講，有啲位未做到最好，所以就Hold住咗，我覺得咁係好事嚟嘅，要做就梗係做到最好先公開，況且o依家我唔需要特別為演唱會做一首新歌，咁不如做到最好先見人。

「上一次演唱會嘅舞台，係朱祖兒幫我設計咗一棵大樹，今次會再有新嘢，暫時嘅構思係同電影有關，因為我有好多歌，都係電影嘅歌曲，所以會朝住呢個方向去諗。」

我同伊健去到位於尖沙咀嘅「唐人館」，品嘗特色中菜，暢談佢開Show前嘅心情。

伊健喺明年2月24至27日，同埋3月1日舉行《Along with Ekin Live Concert 2019》紅館演唱會，外界反應非常熱烈。

滋補燉佛跳牆（$598），係廣州著名嘅燉品，以名貴食材包括鮑魚、花膠、遼參、螺頭等，共冶一爐，既滋補又養顏。

唐人館川味霸王肘 （$438），以大豬手入饌，炆扣至軟熟，皮煙韌，肉嫩滑，入口即化，加入川辣味，將豬肘味道提升。

神秘兄弟

講到排練情況，佢表示現正努力操練，「因為o依家開騷同以前唔同，體力要求好大，而我年紀都有番咁上下，所以要提升番體力。好多人問我露唔露肉，我都係話要睇吓啲服裝點先，同埋睇狀態，我就冇底線，做乜我就着乜。」

喺提升體力上，伊健唔係獨沽一味，佢仲會去親親大自然。「除咗喺健身室操體能，我最鍾意行山，睇吓大自然環境，曬吓太陽。唔係因為開Show，呢個習慣我維持咗幾年o架嘞，最開心係見到呢幾年行山嘅人多咗。香港人壓力太大，應該接近吓大自然，呼吸吓新鮮空氣，咁樣心情都會舒暢啲。」

伊健有一班「黃金兄弟」，嘉賓方面一定唔少得佢哋。「仲係諗緊，但係佢哋已經好興奮，不過除咗佢哋，我都構思緊請啲咩嘉賓，既配合到我嘅主題，又俾到驚喜觀眾。」

伊健生活簡單，有時仲會「餓吓自己」，用作調節身體。

近年多次同「黃金兄弟」開Show，伊健話今次個唱請唔請兄弟上台，暫時仍在構思中。

同製作人錢國偉（中）並肩多年，伊健同佢嘅默契，自然不可取代。

黃脆米茶香煙燻雞（$288），以鐵觀音及香片煙燻雞，茶香滲透至雞肉，炸子雞皮則以吊炸方式炸至金黃，加上粒粒脆米，增加口感。

Party Queen（$118），以Vodka調製，加入雜莓汁及石榴味糖水，於杯邊噴上白蘭地、Vodka及華冠香甜酒製成嘅酒精精華，仿如女士喺狂歡前噴香水一般，香氣撲鼻。

Forbidden City（$118），以Vodka、冧酒、氈酒及龍舌蘭製成，口感較強烈。以提子、檸檬汁及可樂，將其酒精味平衡，再以肉桂棒作點綴。

愛心湯水

今次開Show，伊健喺飲食上冇特別注意，「o依家時間尚早，未需要戒口住，哈哈！就算唔係演唱會，我都唔係暴飲暴食嘅人，係鍾意試唔同嘅菜式，有wine pairing嘅又試吓，原來唔同嘅酒，配唔同嘅菜式，真係會提升到菜式嘅層次。

「我就比較少自己煮，但係我試過學日本節目，打開個雪櫃，見到有咩材料，就用嗰啲材料去煮嘢食，出嚟嘅效果都OKo架。」

佢嘅冬日滋補，就唔少得近年鍾意鑽研愛心湯水嘅鄭太出品。「唔係老火湯，其實唔好成日飲，因為補得太多都傷身。我最近經常飲嘅，係蘋果栗子腰果湯，就算唔落肉都好甜好滋潤，有時食湯渣都食飽咗。有時要餓吓自己，身體機能就會自動開啟自癒模式，病痛都少啲。」

伊健喺上一次個人演唱會中，施展渾身解數，今次佢一樣會全力以赴。

皇湯珍珠星斑件（每位$228），選用矜貴嘅星斑斑柳入饌，放到濃雞湯中，盡收雞湯精華。新鮮嘅星斑切至蝴蝶狀，形態優雅，絕對係手工之作。

白雪藏金龍（$398），將蛋白炒至軟身，軟滑嘅口感加上香濃嘅蛋白味，配以龍蝦中最名貴嘅龍蝦柳部位，將之起球快炒，黑松露就為味道添上層次。

唐人館
地址：尖沙咀廣東道3-27號海港城港威商場4樓4101號舖
電話：21573148