為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 12 月 29 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

我的首置

以前香港同鄉鍾意聚居一區,好似我細個時家住西環,嗰度係我哋「潮人」地帶,我中學、大學歲月都喺西區過。港島另一面嘅北角就係小上海、小福建,其中繼園里一帶文化氣息特別濃厚,皆因當時好多文人雅士旅居或定居香港選擇在此落腳。唔知係咪被呢種文藝氛圍吸引,我人生買嘅第一個物業就係喺北角繼園臺。

當時係一九七六年,我喺滙豐完成實習正式升任Regional Officer,就利用銀行職員房貸首次置業,七七年結婚就作為新居。呢個單位喺繼園臺金運大廈,建築面積七百七十平方呎,當時十七萬六千元(港元,下同)買入。我仲記得大廈有車位,要一萬幾,一來貸款額唔夠,二來當時諗呢世人都唔知會唔會擁有一部車,多數都係安步當車或者搭巴士電車返工,所以最後無買埋車位。點知八一年我買第一部車就無車位用嘞,諗返真係有啲後悔。我喺繼園臺一住八年,到八四年至賣出搬走,當時賣價係二十八萬幾,講真並唔係我最威水嘅投資紀錄,但充滿美好回憶。

所以新世界發展(0017)推出繼園街一號柏蔚山,公司CFO林戰邀請我參觀樓盤,我一口應承。事實上,柏蔚山可謂新世界三代心血,早喺二○○○年之前,公司已經密密收購呢個地段嘅舊樓,到二○一○完成統一繼園里版圖。我今次重遊繼園街,景物當然唔同往日,但我感覺昔日嘅輝煌文化歷史,到咗新世界手上,由一向提倡工匠精神嘅鄭志剛(Adrian)主理,運用低調而有品味嘅工匠手藝,能夠將地段嘅文士風采重現。

大家可能都聽過,五十年代張愛玲來港時曾住喺附近嘅英皇道,相信當時經常出入繼園街,而佢一張最廣為流傳嘅相,就係喺街角蘭心照相館影嘅。我行入柏蔚山嘅會所(Fleur Pavilion)同庭園(Fleur Island),首先感受到日式美學之下嘅寧靜和高雅。設計師用植物和水連接多層室外空間,並將室內和園林連結,室內室外都可以享受園林景觀。園景突出「歲寒三友」松、竹、梅,唔知係咪向蘭心照相館致敬。

睇得出樓盤嘅公共空間同設施設計都好有心機,用簡單而素淨嘅室內設計配合庭園,都市人生活繁忙,設計令住戶可以遠離煩囂、放鬆身心。會所室內約二萬八千呎,連園林約七萬呎,設有室內、外泳池、健身室、兒童遊樂場及宴會廳等設施。

項目在今年五月推出,呢個時機選得好啱,避過中美貿易戰升溫和樓市新六招,可以見得到Adrian嘅敏銳商業觸覺。樓盤一推出就引起市場關注,首批二百四十七個單位一日內售出九成六。截至十二月十四日,項目六百一十一個單位累售四百八十一伙,套現約一百一十四億元。加埋其他樓盤,集團今年賣樓已超額完成。

柏蔚山能夠將地段嘅優越性同歷史,結合建築和設計,難怪樓盤網站介紹,呢度係作家、思想家、工匠與藝術家相遇嘅地方。我喺繼園街建立自己第一個家,對呢個樓盤,會再加十分感情分!

柏蔚山可謂新世界三代心血,項目在今年五月推出,呢個時機選得好啱,可以見得到鄭志剛嘅敏銳商業觸覺。