現年五十一歲的鄭伊健，唱過多首經典情歌，愛情世界亦同樣精采。他曾動地驚天愛戀過，經歷轟動娛圈的戀情；最終，性格似個「大細路」的他，被外界認為畀蒙嘉慧收服。兩人拍拖七年、結婚五年，雖然鮮在人前「放閃」，但甜蜜度卻爆晒燈。早前，伊健演唱會的記招上，老婆便驚喜拍片支持，掩藏不住那份濃濃情意。

事實上，外表看來玩世不恭的伊健，冧妻卻有反斗奇招。當年，他就靠送上水煲訂情，終抱得美人歸；而現時夫妻相處之道，則靠打機玩樂，維繫感情常鮮。然而，他亦不失窩心體貼的另一面，當年外母患癌，扶持蒙嘉慧照顧病母；並坦承早前一擲近千萬買地建屋，讓外父安享晚年。

一個為她甘去蹈火海的人，親述和蒙嘉慧同甘共苦十二年的愛情歲月。

婚前婚後與蒙嘉慧保持低調的伊健，罕有在訪問中親述與愛妻相處的生活點滴。

驚喜打氣

明年二月，鄭伊健將在紅館舉行個人演唱會；日前的記者會上，老婆蒙嘉慧靜悄悄拍片鼓勵，她在片中說：「知道你為咗演唱會做咗好多準備，屋企啲過期食品等完咗先食，我會繼續做老婆做嘅嘢，唔使擔心我，湯水繼續有，老公加油！」事後，他表示大感驚訝，坦言之前不知老婆拍片。夫妻似乎心有靈犀，其實較早前，伊健接受本刊專訪時，談起老婆在其個演唱擔當甚麼角色時，他笑言：「過往我開演唱會，佢都係做番自己，愈普通心情愈好，唔會有壓力，生活上亦都唔會有咩改變，做完演唱會就繼續返屋企，有湯飲咪飲囉。」

對於大家期待的一幕，伊健台上唱着〈一生愛你一個〉或者〈感激我遇見〉等冧爆情歌時，會情深款款凝望台下蒙嘉慧的畫面，他沒好氣地說：「我性格就係，大家都咁做，我就偏偏唔咁做。其實每一次演唱會，佢喺後台，我已經好開心，已經畀我好大信心，唔需有部機（攝影機）影住後台嘅。到做完演唱會，大家諗去邊度旅行玩，就已經最窩心喇！當然，平時我都會同佢share我嘅工作，譬如遇到啲咩或者諗到啲咩，佢有時都會第一個知。」

雖然，兩人婚前婚後都保持低調，抗拒將感情放上舞台，但另一半給予他的動力毋庸置疑，伊健直言：「能夠遇到佢係好開心，所有嘢我o依家都好放心。我阿爸、阿媽，佢都照顧得好好；我哋嘅嗜好又好一樣，所以我放假嘅時候，可以好好咁同佢一齊放鬆去玩，放完假又可以專注，認真做番我嘅工作。」基本上，兩人的生活就是簡簡單單，拍拖活動與一般人無異；而大家有着共同的嗜好，都鍾意運動、行山、踩單車，最特別是夫妻都鍾意打機，有時老婆還比他更沉迷，「有時我哋會問吓對方，咦，你打呢隻game呀？我打緊呢隻喎！雖然各自玩，唔一定一齊去『食雞』嘅，但都係大家好好相處嘅活動。」

年前蒙嘉慧腳傷，伊健體貼愛妻，照顧周到。不過，他謙稱沒有功勞，指老婆對醫療保健素有研究，而他僅陪伴對方一起做復康運動。

兩人不時結伴出埠去旅行，孭背包、手拖手的背影照，既甜蜜又溫馨。

年前，伊健結伴蒙嘉慧帶同父母一起到日本北海道旅行，可見一家人相處融洽。