為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 12 月 23 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

高手出招

真正嘅高手,係深藏不露,同時係有口皆碑嘅。今次「Paco巨星飯堂」,就邀請到資深高手「八爺」袁和平,同埋新派高手張晉,集兩大高手嘅新作《葉問外傳:張天志》,自然份外矚目。

我帶兩位高手,去到位於尖沙咀嘅「北京樓」,品嘗有口碑又有特色嘅京菜,大談新作背後嘅故事。

喺動作電影嘅世界中,八爺嘅江湖地位崇高,由佢出手為新貴阿晉打造新作,梗係拳拳到肉,打得精采!

 

度身訂造

阿晉係紅褲子出身,今時今日練得一身好武功,佢今次喺新戲,有唔少拳腳及於高空,同對手連場打鬥嘅驚險場面,全部由導演八爺為佢度身訂造。兩師徒合作,八爺對徒弟要求特別高,令阿晉爆發力提升。

八爺對徒弟有讚冇彈:「抽得打得就係規矩,但啲戲都要得,同動作配合先好睇。我專登加插咗唔同腿法俾佢發揮,令畫面更加豐富。」

八爺表明,打得係最簡單的要求,打得以外都要「有戲」配合演出,「今次我特別展示詠春嘅腿法,將葉問一招三套嘅功夫,加以改良同變化出嚟。另外,我仲搵咗摔角出身嘅阿Dave(戴夫巴蒂斯塔、曾演出《銀河守護隊》),仲有Tony Jaa兩個勁人同佢打,雙向先會更加精采。」

其中一幕,係喺搭建招牌街上嘅打鬥戲份,阿晉話拍時都戰戰兢兢。「好高反而唔驚,因為只係布景,呢場係4、5層樓,雖然唔係好高,但全部用實景,要喺招牌上追逐同機器配合特別難,加埋我有畏高,對我嚟講更難。」

要極速克服畏高,阿晉話:「一action就要嚟,有手足話試吓戲先,我話唔好試,一試就唔係嗰個動作,第一下就要去,咁仲可以壯膽添。」

阿晉仲話,同Dave對打嗰種壓迫力係精采場面之一,「最難忘係一幕俾佢打到全身打橫飛向雲石吧枱,因為冇軟墊我硬撞落枱,戲中亦有唔少挨打嘅場面。冇得錫身o架,因為有冇力度、係真係假,真係一睇就知,所以要出盡全力。」

我帶兩位嘉賓,去到位於尖沙咀、啱啱以全新面貌示人嘅「北京樓」,品嘗有口碑又有特色嘅京菜,大談新作背後嘅故事。

 

為咗將阿晉嘅武藝展現得更精采,八爺特別搵嚟摔角手出身嘅Dave(左圖),仲有Tony Jaa(右圖)做佢對手,強強對決。

 

 

 

東坡肉($158),以古雅器皿盛裝,配上渺渺輕煙效果,賣相一流;而且肥而不膩,層次分明,滋味無窮。

 

揚州龍青瓜($88),用上柚子青檸醬汁,配搭新鮮青瓜,味道清新宜人。

 

麻醬雞絲撈起($108),為傳統節慶菜式,以青瓜、紫椰菜、雞絲及蘿蔔搭配粉皮,加上麻醬,色彩繽紛。

 

再度合作

阿晉同另一位對手楊紫瓊,喺電影《臥虎藏龍》因做替身而認識,今次二人變咗對手,佢覺得係緣份好神奇,「多年後再相遇,佢依然功夫好好,不減當年,對一個女人嚟講好難。今次同佢對打,我親身體會到佢當年嗰種勁、快、速度,尤其係佢唔係練武出身,呢方面學得好快。」

八爺都盛讚楊紫瓊:「喺度橋時,她已經很快知道點演出,領悟力好高!」

做動作演員,周身傷習以為常,阿晉話太太蔡少芬曾經去探班,但見到拍激烈動作場面,Ada就唔敢睇,所以佢唔主張拍打鬥戲時屋企人在場。「咁會嚇親佢,本來佢同八爺好好,但係之後佢驚咗八爺。但係啲動作一定要去到盡先入到戲,有個鏡頭拍我俾人打,擋到手瘀晒,佢見到就嚇到呆咗,於是我就叫佢走。」

新戲仲有無功夫底子嘅鄭嘉穎,阿晉同佢都有對手戲,佢笑言,「對打時嘉穎都會話好痛,但我就冇太過遷就。」

阿晉話太太蔡少芬曾經去探班,但見到拍激烈動作場面就唔敢睇,所以佢唔主張拍打鬥戲時,有屋企人在場。

 

阿晉同楊紫瓊高手過招,梗係打得悅目;而後者嘅旗袍造型,直情活化六十年代嘅典雅。

 

 

 

糖醋桂花魚($298),糖醋於中國料理中意指將糖與醋混合成小芡的甜酸汁醬。魚塊酥脆甘香,肉質滑溜,甜汁醒胃可口,成為經典佳餚。

 

烤北京填鴨($460一隻/$240半隻)為鎮店菜式,嚴選油脂分量少嘅上等北京嫩鴨,務求達致皮脆肉嫩,油膩感輕。

 

重慶覓食

講功夫,八爺同阿晉梗係高手;講到食,八爺就話:「好食嘅我就食o架嘞!不過去邊度拍戲都好,我都鍾意歎一杯凍檸茶。喺香港開工就一定飲到好飲嘅,但係喺外國開工,啲凍檸茶嘅質素就好麻麻,但係我都會飲。」

阿晉來自重慶,佢都有家鄉美食推介。「一講重慶,好多人都會諗到麻辣火鍋,嗰度有好多火鍋店,令人好花多眼亂。最近一次我返去,就食咗『白樂天』,辣係好出色嘅,佢哋嘅招牌菜係梁山雞,我仲欣賞埋餐廳嘅service,叫外賣送可以埋去酒店!」

八爺大讚阿晉:「一個好演員真係要自己去諗、去設計點樣演出,到現場拍攝就會更加好,所以今次我俾佢90幾分!」

 

雖然鄭嘉穎同周秀娜冇特別嘅動作戲份,但因劇情需要,前者掌摑後者,八爺都要佢摑得真,真係考工夫。

 

喺拍攝現場,八爺經常落場親身示範,務求拍攝效果盡善盡美。

 

青蘋果酥($45/三件),大廚特意以青蘋果入饌,青蘋果蓉配搭上層層鬆化嘅千層酥,清新怡人而不膩,絕對係飯後甜點嘅精選。

 

東海龍皇($780),用料新鮮,將大蝦、螺片及帶子,以魚香醬炒香,配上龍形雕刻,極考刀功。

 

北京樓
地址:尖沙咀梳士巴利道3號星光行3樓
電話:27358211