為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 12 月 22 日

諸葛紫岐百般寵愛寶貝仔

名媛諸葛紫岐(Marie)同Neway太子薛嘉麟,誕下嘅寶貝仔薛華韜(Arthur)已經五歲。Marie坦言,乖仔喺佢心目中位置第一。早前,自細鍾意恐龍嘅Arthur生日,夫妻就別出心裁幫佢搞咗個恐龍主題嘅生日派對,仲話囝囝心願係想快啲有細佬妹,所以會努力「造人」!

日前,東姑就喺中環嘅置地廣場,見到呢位廿四孝媽咪,湊住囝囝行街。雖然乖仔全程跳跳紮冇時停,但係Marie對住佢無比咁有耐性,仲差唔多乜都畀阿仔話事。現場所見,Marie先係拖住寶貝仔,行上樓上一間蛋糕店,睇嚟係一心買甜品o氹囝囝;同時,Marie又烏低身聽從佢嘅吩咐,由佢指住雪櫃自己揀。期間,囝囝真係超級活潑,趁媽咪畀錢時,一個轉身就自己走開咗,喺度揈手揈腳變身扮超人,十足甩繩馬騮。不過,Arthur人仔細細勁老積,搶住幫手拎住袋蛋糕,百厭得嚟有時都幾乖仔!

之後,母子同埋外傭行落樓下一間餐廳。坐低之後,Marie即刻照顧小王子食咗啱啱買嘅蛋糕先,然後自己再同朋友食嘢傾偈。不過,Arthur食完嘢又再坐唔定,拖住外傭姐姐走開去欄杆邊四圍望,後來仲撇低媽咪,走埋落樓下大堂,睇商場佈置嘅聖誕裝飾;而佢仲邊行邊喺度跳跳紮,搞到外傭又拖又拉都捉唔實。話晒Arthur都係集萬千寵愛於一身嘅「金叵籮」,難怪媽咪同工人都冇晒佢符喇!

Marie夫妻對寶貝仔疼愛有加,Arthur從小鍾意恐龍,所以佢哋特別安排以恐龍為題嘅生日派對,仲訂製咗一個跟囝囝同等高度嘅巨型恐龍生日蛋糕,畀佢驚喜。

 

五歲大嘅Arthur,老積要自己拎住一袋蛋糕,再拖實媽咪Marie行落樓下餐廳。

 

對囝囝好有耐性嘅Marie,任由佢自己揸主意,喺雪櫃前揀蛋糕。

 

食完嘢,Arhur即刻坐唔定,扭計工人姐姐帶佢行去欄杆邊睇風景。

 

點知落到大堂,Arthur猶如一隻甩繩馬騮通處跑,工人姐姐驚小主子整親,於是兩人就好似玩「捉伊人」咁款。