為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 12 月 20 日

兩人選均非最理想 港大法律學院院長遴選撻Q

香港大學法律學院院長何耀明下年六月約滿後不獲續任,校方成立遴選委員會物色接任人,進入最後兩強嘅人選包括喺澳洲悉尼大學法學院任教嘅華裔教授凌兵,以及澳洲昆士蘭大學法學院副院長(研究)Simon Bronitt。以為進入直路之際,委員會因為未能達成共識,決定重啟物色程序。

消息人士透露,兩名候選人條件旗鼓相當,各有優缺點、無人取得壓倒性優勢,遴選委員會唔想夾硬推薦人選,決定推倒重來。「兩人各有長處,也有不足處,有些委員覺得佢哋未夠班,也有人覺得資歷唔夠,唔想為選而選,不如重新物色更好人選。」

港大法律學院新院長嘅遴選工作遇阻滯,要重新物色新嘅候選人。

其中,喺內地出生嘅凌兵曾經喺中大、城大法律學院任教,又喺澳洲教書。有人認為佢係認真嘅學者,但也有人擔心其內地背景,或惹法律界非議。Simon Bronitt喺澳洲任職逾廿年,有委員認為佢面試表現平平。

如今遴選程序重頭嚟過,有消息指校方當務之急,係要決定是否解散現有嘅遴選委員會,成立新嘅委員會,然後再搵獵頭公司物色候選人。「o依家距離何耀明退任仲有半年,時間緊迫,相信校方好快決定係咪解散該委員會。」

凌兵(左)及Simon Bronitt進入兩強,佢哋互有優點,也有不足處,遴選委員會成員意見分歧,決定推倒重來。

此外,七十三歲、人稱「教育界沙皇」嘅港大校委會主席李國章獲續任多三年。據了解,當局早喺今年七、八月已向李國章「摸底」,了解佢留任嘅意願,當時李國章表現得未有去意,當局就放下心頭大石。

消息人士透露,校務政治化下,有乜風吹草動,外界便將矛頭指向校委會主席,需要硬淨嘅人出任。李國章係少有合適嘅人選,「佢過去拆過唔少政治炸彈,頂住學生及輿論嘅壓力,力排眾議堅守校方嘅原則底線。」

港大嚟緊嘅政治炸彈中,以該校法律系副教授戴耀廷嘅教席問題最受關注,皆因佔中九子案嘅聆訊已步入尾聲,最快明年四月有裁決,一旦罪成,戴耀廷嘅教席隨時要按程序褫奪,但咁富爭議性嘅決定,一定會惹起「黃絲」及該校部分學生嘅反響,觸發另一場風波。消息人士表示,「呢個燙手山芋要由膊頭硬嘅人處理。」

李國章獲續任三年,消息指政府幾個月前傾向續任,希望佢坐鎮校委會處理政治炸彈。