為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 12 月 22 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

茶市與股市

金融人成日話,睇吓中環酒樓午市生意如何,就知道股市大概走勢。記得亞洲金融風暴之後,到一九九八年八月十三日,恒指低見六千六百六十點,十四日上午市場繼續低迷,我去陸羽飲茶,見到平日全場爆滿嘅酒樓得返四檯客。當日下午,政府就宣布入市干預。

同老友陳振傑講起,佢創辦嘅利寶閣同樣經歷過九七金融風暴、○三年沙士、○八金融海嘯,真係幾許風雨、順流逆流。事實上第一間利寶閣正正喺九八年六月在利舞臺廣場開張,當時雖然不乏公司客幫襯,但經濟始終不振,開張後無法封蝕本門。利寶閣除咗靠平靚正留客之外,陳兄仲醒起,之前移民加拿大見到當地人好鍾意剪報紙嘅優惠券,於是就將呢個概念引入香港,結果轉虧為盈。○三年沙士,市況更加嚴峻,唯有各方面減省成本,包括員工九折出糧,共渡時艱,加上同上環老字號海味舖關係好,有新到靚貨一定通知佢,所以能夠穩住生意。

公司現時喺香港共有五間中式酒樓,另外喺深圳有兩間酒樓同一間泰菜餐廳。酒樓生意靠品質、價格、環境、服務,而公司嘅成功就要講管理和發展策略。利寶閣喺一六年六月上創業板,一七年總營業額約三點○七億元(港元,下同),純利約二千三百萬元,按年分別增加一成及一倍,主要由於深圳酒樓業務嘅貢獻。今年利寶閣達成所有轉板條件,喺八月轉到主板上市(1869),陳兄希望公司股份喺主板上市可以進一步提高知名度,有助未來增長。

公司喺香港嘅酒樓主要位於中高檔及人口密集地區,因為希望可以同時吸納寫字樓、商場及住宅客源,令客戶基礎更多元化,生意更加穩定。第二度我唔敢講,上環利寶閣午市就真係好旺場,今個星期做冬,公司同事要提早兩個禮拜book檯。據陳兄講,深圳酒樓生意升幅點解咁大,以做冬為例,內地人五點半已經開始食晚飯,所以完全可以做兩輪,而過去一年更加連貴賓房都做到兩輪,難怪一七年內地分部營業額升三成五。

今年上半年生意暢旺,做到冇停手,但陳兄見到市況受中美貿易戰影響,開始有放緩跡象。內地零售表現持續走低,而曾經反彈嘅香港零售業亦喺下半年顯露疲態,政府公布八至十月與先前三個月比較,經季節性調整零售業總銷貨價值估算下跌百分之二點二。零售業界認為貿易戰對消費者心理影響嚴重,有估計下半年增幅只及上半年一半。

另一方面,香港舖租、人工、食材成本不斷上漲,對公司毛利有一定影響。陳兄除咗加強成本控制之外,仲會加大內地發展,出年會開多一兩間,其中一間新酒樓會在第二季喺深圳中央大街開業。陳兄亦好注重品牌形象,搵識飲識食嘅蘇施黃做代言人之外,裝修衞生等方面亦好注重,要切合集團嘅中高檔形象。

冬大過年,無論個市點走,我希望大家都食個溫暖嘅冬至飯,亦祝香港冬日安祥!

利寶閣一六年六月上創業板,今年八月轉到主板,希望進一步提高知名度,有助未來增長。