爸爸的愛情忠告

今日，阿爸想同你講吓「愛情」呢兩個字。

可能你會話：「阿爸，我仲咁細，從未諗過要拍拖，唔使咁快講畀我聽啦。」

不過，我想講關於愛情嘅第一樣嘢就係，你從來唔知佢會幾時出現，有人十零歲就已經攬頭攬頸，拍拖拍到天昏地暗，有人五六十歲依舊孑然一身。

愛情，就好似一種流行性感冒咁，既然防不勝防，倒不如早啲做定預防措施好。

以下就係我要講嘅愛情忠告。

1.一見鍾情，係好多年輕人會遇上嘅情形，而且仲唔係一兩次，而係好多次，分分鐘坐一程港鐵，你會一見鍾情幾次添，原因係你呢個時候，對愛情有無限幻想，對愛人有無限期待，一見到個樣貌身形稍為合眼緣嘅，就會認為已經搵到一生中最愛，但其實係唔係呢？喺呢個好似好吸引嘅異性背後，你又知幾多呢？如果最後認識唔到，又需唔需要唔開心呢？以上問題，都係我要你自己好好反思一下嘅！

2.雖然，人人拍拖都可能會先以外形嚟判定自己鍾唔鍾意對方，不過，外形係會隨時日同健康狀況而有所改變，如果有一日，你最愛嘅佢變成另一個樣，你仲鍾唔鍾意佢呢？假如答案係肯定嘅話，咁恭喜你，你的確好喜歡對方，不過，如果你嘅答案係唔肯定嘅話，咁我建議你再檢討一下呢段感情。

3.一個人兩條心未為多，呢句話，好多人都講過，尤其喺你呢一個年紀，未必好快就會肯同一個人穩定落嚟。本來，人揀你，你揀人，係好平常嘅事，只不過，你應該畀對方知道，佢暫時仍然未係你嘅唯一，因為你仲想睇多啲呢個世界，千祈唔好畀佢一個錯覺，認為大家已經默許終身，因為萬一真係分手，或者畀佢發現你仲有第二個伴侶，佢承受嘅打擊一定好大，而你，要負嘅責任亦最大。

4.愛情大過天，係好多年輕人嘅態度。其實，喺你呢個年紀，有一樣嘢係一定比愛情重要，呢樣嘢就係你嘅學業。

世界上無十足把握嘅愛情，但係就有肯定回報嘅努力。只要你肯付出時間同心機，你就會得到一定嘅好成績。

最重要一點係，乜嘢年紀都可以拍拖，但係你有無見過一個三十歲嘅人去返小學？

讀書嘅年紀，過咗就再搵唔番，請好好珍惜。

5.最後，如果遇上愛情挫折，請記着，香港有七百萬人，依家只係一個唔鍾意你啫，你嘅機會仲有數唔到咁多，與其自暴自棄，倒不如買幾件靚衫，執番好個樣，靜待下一次嘅緣份仲好，而且，如果愛情係似一場流行性感冒嘅話，你依家已經有咗一定嘅抵抗力嘞，係唔係更加值得開心呢？