為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 12 月 16 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

繽Fun開電視

睇電視,唔止係娛樂咁簡單,有質素嘅電視節目,仲會令你長知識。

陳志雲(Steven)與葛民輝近日為「香港開電視」,分別主持開台節目《志雲拆局》及《兒嬉立法會》,雖然佢哋笑言係俾有線高層王喜o氹入局,不過做落又幾fun。

兩個節目都有橋有料,我就帶兩位主持,去到位於銅鑼灣嘅「Cubus 28」,品嘗特色嘅Fusion菜,暢談兩個節目背後嘅故事。

能夠請得志雲大師同阿葛主持節目,我相信兩個節目都會走出固有嘅框框,為睇電視加Fun。

 

兩大師入局

志雲大師同阿葛嘅節目,都係喺周六黃金時段播出,今次佢哋會為「香港開電視」做節目,二人直指全因被王喜o氹入局。

志雲大師稱:「佢同我講有邊個邊個做,但個個對我都唔重要,我淨係聽到葛民輝三個字,我就問葛民輝真係做?跟住王喜仲話:『葛民輝收得好平,佢真係好錫我。』言下之意係,如果我收得貴,就係唔錫佢。」

阿葛即回應:「呢啲就真係識講嘢,果然係電台出身!其實王喜講俾我聽嘅古仔,係已經齊晒腳,人才濟濟,當然仲有志雲大師,仲話你(陳志雲)已經開緊工,又同邊個邊個傾緊嘢、點樣拆局,講到似層層咁。」

志雲大師笑言,應該搵埋王喜一齊做訪問,當面對質拆穿佢嘅詭計,阿葛聞言即話:「咁真係志雲拆局喎!」

提到《志雲拆局》,志雲大師坦言,最初嘅想法係單對單嘅嘉賓訪問,後來跟王喜再商量,變成o依家嘉賓雙方對立嘅模式。

「我都覺得好玩嘅,特別係兩邊持唔同意見,我只係好似一種催化劑,因為兩邊都唔覺得我有攻擊力;而最重要係,我自己做得冇咁辛苦,既然大家對立,我就唔係好使講嘢;不過中間啲反應shot,要等佢哋傾完晒,我就跟住拍番唔同嘅表情。」

我帶兩位嘉賓去到位於銅鑼灣嘅「Cubus 28」,品嘗特色嘅Fusion菜,暢談二人主持嘅電視節目。

 

雖然志雲大師同阿葛不約而同話,俾王喜

 

手撕法國鵪鶉伴海膽汁海蜇($128),以中式嘅烹調手法,製作嚟自法國同日本嘅食材,同曾經為微軟之父蓋茨(Bill Gates)等名人下廚嘅餐廳行政總廚,不無關係。

 

韃靼牛肉配溫泉鵪鶉蛋及柚子胡椒醬($148),鵪鶉蛋味道比雞蛋更濃,效果更有特色。

 

櫻花蝦避風塘茄子($98),貌似椒鹽豆腐,但香脆嘅薄皮之下,其實係juicy嘅茄子。

 

有深度話題

而節目嘅議題都好廣泛,很多係關於道德同社會價值觀,反而冇乜政治議題。志雲大師稱:「其中一集講『驅魔』,究竟你係咪信就驅到魔呢?我哋搵咗兩個組織嘅代表,各自講心目中嘅鬼係點,邊個驅魔叻啲?又有講『同性戀者可唔可以有個家呢?』、『安樂死』同『自己性別係咪自己揀?』。

「啱啱錄咗輯係講『性解放』添,兩方都係女仔,一個守貞操守到四十歲,後來變得解放;另一位喺十年內拍咗十個拖友,佢同個個都發生性關係,墮過胎兩次,但o依家變得好保守,跟住大家又拗,都幾好玩!」

至於阿葛嘅《兒嬉立法會》,最初係因為王喜構思咗一個有關小朋友嘅節目,又諗到阿葛未同小朋友合作過,於是就問佢有冇興趣。「我最初以為個節目要講時事,我又唔睇新聞又不問世事,後來先知道背後真締係要同小朋友傾偈,俾佢哋發表自己嘅意見,我就覺得幾好玩。」

除咗電視、電台節目,志雲大師嚟緊仲會參與舞台劇演出,可謂瓣瓣通。

 

志雲大師喺唔同嘅議題上,同正、反雙方嘅嘉賓,搵出合理嘅結論。

 

 

 

除咗志雲大師同阿葛嘅節目,頻道仲有兩個分別由陳啓泰同雷深如主持嘅新節目,同樣有深度。

 

Cubus點心拼盤($168),製作得悅目嘅點心,皮薄餡鮮。

 

花膠螺頭片波士頓龍蝦湯($168),集中西嘅烹調特色於一身,啖啖鮮美。

 

絕對唔兒嬉

阿葛仲話,自己最愛唔係節目本身,而係幕後花絮。「每次都有唔同議題,最開心係撻着啲o靚仔,可能係問佢唔要阿媽,但加番爹哋俾佢好唔好?佢哋取捨完我就會問點解,一講點解就正嘞!因為我安排咗啲細蚊仔,坐喺前面做『議員』,後面觀眾席係佢哋嘅爹哋或媽咪,當個o靚仔俾我撻着咗,就會爆老竇點樣衰、點解唔要老竇,佢老竇坐喺後面即刻滴汗、面青同吞口水。而且一個爆得興起,隔離嗰個又諗原來呢啲係講得o架喎,又會跟住講,我反而鍾意睇呢啲,夠真情流露!」

仲有一件趣事,令阿葛來不及反應,事緣現今父母生小朋友都係一個起兩個止,有次佢問啲小朋友:「點解你唔叫爸爸追個妹妹畀你?問問吓講起我哋以前嗰代,好興問阿媽我哋點生出嚟?我話我係石頭爆出嚟,跟住有家長話喺坑渠邊執返嚟,有啲又話喺山邊。

「當我同啲家長吹水吹得興起,場內一個六歲嘅男仔突然搭訕話:『係陰道吖!』跟住全場嘅人靜咗。吖!彌敦道我聽過、佐敦道我聽過,道道道道非常道,黃霑首歌都係咁唱。小朋友呢條道喺邊度嚟呢?佢哋講得出咩子同咩巢,我哋細個邊度知?所以有時啲o靚仔你都估佢唔到,但無啦啦咁插嘴,都幾好笑o架。」

有份參與今次節目製作嘅阿葛,由暑假就開始喺七十名小朋友中選出七位,而其中一個條件,係小朋友嘅父母可以喺暑假中抽出四日,每日參與拍攝八小時,將整個製作變成一個親子夏令營。

 

阿葛喺一連十五集嘅節目中,與小朋友穿上特製嘅「公仔衫」,分別化身成主席同議員,喺各項關乎兒童權益,以至社會民生嘅議題上,針鋒相對。

 

盆曬生抽炒頂級安格斯牛河($168),將簡單嘅乾炒牛河升級,而且物有所值。

 

金湯蟹肉鍋筍絲($168),係清淡口味之選。

 

金莎芥末鴛鴦蝦球($168),選用嚟自越南嘅大蝦製作,兩種口味都各有性格。

 

Cubus 28
地址:銅鑼灣開平道1號Cubus 28樓
電話:2562 3123