為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 12 月 19 日

鄭經翰一家溫馨

今年七十二歲嘅電台名嘴鄭經翰(鄭大班),宣布封咪退休,o依家已經好少參與佢一手創辦嘅網台D100嘅節目同營運。佢以前日忙夜忙,好難兼顧家庭,o依家樂得清閒,最好不過當然係對老婆、囝囝盡量補償,好好享受家庭生活。

早前,東姑就喺銅鑼灣巧遇鄭大班同埋太太勞錦嫦及佢哋嘅囝囝,一家三口行街。鄭太一臉開心滿足,左手挽住老公、右手挽住囝囝,三個人並肩而行,一路上有傾有講,場面十分之溫馨。可惜,冇幾耐,鄭大班好似故態復萌咁,拎住電話猛傾,冷落身旁兩仔乸,唔知點解佢退咗休仲咁忙呢?

不過,東姑所見,佢哋廿歲出頭嘅乖仔,昂藏六呎幾高,生得高大威猛、英偉不凡,當日仲戴住副黑超充滿星味,就算做幕前都一啲唔失禮,鄭大班應該幾「飲得杯落」,不如老來從子,無謂再辛苦喺事業上衝鋒陷陣喇!

鄭太勞錦嫦一隻手挽住囝囝,另一隻手挽住鄭大班,一家三口並肩而行,畫面勁溫馨。

 

行行吓,鄭大班就掛住傾電話,而一表人才嘅鄭公子就自己行開,更加覺得佢生得高大威猛,同有幾分星味。