黃秋生狼吞虎嚥

近來，影帝黃秋生忙住為佢進軍歐美影視市場嘅美劇《陌路追凶》，以及無償接拍本土新晉導演、戲中演半身不遂人士嘅電影《淪落人》做宣傳，工作都幾繁忙，就連十月過身嘅媽媽喪禮，都要延至十二月舉行，睇嚟真係忙到「甩轆」。

早前下晝，東姑就巧遇佢同藍髮女助手，同埋一個長髮女友人，喺中環置地廣場一間餐廳度開餐。睇嚟好肚餓嘅佢，坐低即刻叫咗碗麵，然後三扒兩撥，立即大啖大啖咁食。雖然，佢食到狼吞虎嚥，但有女陪食寧舍開胃之外，心情仲似乎特別靚，邊食邊不忘同兩個女伴傾偈，好傾到雞啄唔斷，仲不停手舞足蹈，似係大講笑話，o氹到兩女笑到四萬咁口。

醫肚之後，秋生插住褲袋chok晒咁同埋女友人離開商場，行出門口等車。之後車來到，佢再帶頭上車，認真霸氣兼man爆，啲男人味完全滲晒出嚟，東姑離遠都feel到。

睇落好肚餓嘅秋生，坐低即刻好猴擒，狼吞虎嚥咁食麵醫肚。

表情多多嘅秋生，似係同兩女大講笑話，

有兩個女伴陪食麵，秋生胃口大開，三扒兩撥就KO晒成碗麵。

雖然手仲揸住筷子，但秋生不停口繼續講嘢，仲興奮到指手劃腳。

開餐之後，秋生同兩女伴一齊離開餐廳，喺商場門口等車。

帶頭上車嘅秋生，好man、好霸氣，離遠都feel到佢強勁嘅氣場。