一四年曾患上乳癌的本地時裝設計師張潔雯（Bonita），自抗癌成功後，學識及時行樂，與老公踏上環遊世界之旅。

早前她遠征北非「幻彩國度」摩洛哥十天，遊歷三大「彩色城市」，包括火紅色的馬拉喀什（Marrakech）、泥黃色的菲斯（Fes）及藍色的舍夫沙萬（Chefchaouen）。

「我好鍾意了解唔同國家嘅歷史文化，一直好想去摩洛哥，當地曾經被法國同西班牙統治過，融合咗非洲、阿拉伯同歐洲三種異國風情，周圍嘅建築都七彩繽紛，我仲專登做咗幾套衫去影靚相，無論點影都咁靚，絕對是女士們夢寐以求的『打卡』聖地。」

 

購物天堂

Bonita第一站去到馬拉喀什老城區（Marrakesh Medina），甫入城精神頓時為之一振，皆因區內設有傳統市集，專門販賣皮拖鞋、香料、乾果、燈飾等著名土產，是旅客們必到的「血拼戰地」，張潔雯亦不例外，於各攤檔留下不少「銀両」，狂掃戰利品。她提醒，睇o岩一定要向店主殺價。

「我一向鍾意顏色豐富又具異國風情嘅特產，以前我去埃及、土耳其都係咁買嘢，去到摩洛哥當然亦好難忍手。個市集大到好似迷宮咁，根本行唔晒，所以睇o岩就要買。最鍾意買佢哋嘅皮拖鞋，幾十蚊至幾百蚊港幣已經買到一對，我買咗六對唔同顏色嘅鞋嚟襯衫，又買咗啲裙、衫、精油、燈......加埋都係幾百蚊埋單。不過買嘢一定要講價，最少殺佢一半價先，買嘅嘢最後價錢可以平到三分之一。」

Herboriste du Paradis專賣藥、油和香料，深受旅客歡迎，張潔雯買了不少香薰油作手信。

菲斯內的皮革廠是目前唯一還保存手染皮傳統的地方，師傅會於五顏六色的染缸中，以人手按壓羊皮方法讓染料上色，她指：「呢度好大陣染料味，導遊會派啲薄荷葉俾我哋聞，辟走啲染料味。」

摩洛哥人大多數信奉伊斯蘭教，因此衣着相當保守，建議女士以穿長裙或長褲為主。