為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 12 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

精采兄弟

煲外國劇集,不如撐番自己人!由王浩信、楊明和伍允龍(Philip)主演嘅TVB台慶劇《兄弟》,戲味濃郁,精采情節相當襟煲,係最新熱選!

今次「Paco巨星飯堂」就請嚟「兄弟」之一的Philip,率領喺劇中熱愛打拳嘅劉穎鏇(Tiffany)同飾演保鏢嘅江嘉敏(Kaman),去到位於旺角嘅「目利きの銀次Royal Grill」,品嘗時令嘅沖繩料理,細說拍劇點滴。

Tiffany、Kaman同Philip喺《兄弟》入面施展渾身解數,以動作、演技打動觀眾。

 

絕食為靚

故事以失散多年嘅親兄弟做主角,講述三兄弟因九七年金融風暴,各散東西。長大後重聚,竟發現大家有心靈感應,之後互取對方專長,卻發現沖散佢哋嘅原因,原來埋藏住極大嘅陰謀。

Philip喺劇中飾演警察,「我嘅角色叫何鐵男Iron Man,今次套劇俾到好多位我發揮,觀眾應該最想睇我打擂台嗰場,因為我同浩信都要打。最辛苦係咩?就係要除衫!所以我哋差唔多成兩個月,都冇乜點食嘢。正式拍攝嗰個禮拜,仲冇乜點飲水,等啲肌肉乾啲,拍出嚟靚啲。」

而佢同楊明都有好多打鬥場面,Philip就大讚對手。「阿楊唔係武打演員,但係佢係一個非常醒目嘅人,可能因為佢經驗多,所以掌握得個節奏好好,『老飛躍』吖嘛!好多時我同佢打,出嚟嘅效果都好好。」

女將Kaman就表示,今次係佢第一套劇脫離中學生嘅角色,但演保鏢,都係要着制服。「監製好大膽,用我呢個新人去拍視帝浩信,當我聽到佢係我拍檔,就話佢好高,然後嗱嗱聲打去服裝部,叫同事俾啲高踭鞋我着,但可惜我係保鏢,唔着得高踭鞋行咇,所以拍時要辛苦浩信,擘大隻腳企同幕後工作人員用箱墊高我,收窄番我哋嘅身高差距。」

我帶三位嘉賓去到位於旺角嘅「目利きの銀次Royal Grill」,品嘗特色日本料理,細說拍劇嘅點滴。

 

除咗Kaman(左)同Tiffany(右),《兄弟》嘅另一位女主角係朱晨麗(中),三位因拍劇而成為好友,獎項已係其次。

 

Philip(中)同楊明(前)及王浩信(後)飾演三兄弟,喺劇中爆發戲味。

 

松葉蟹味噌甲羅燒($178/兩件),為時令菜式,配上多士食用,既rich又唔膩。

 

軟殼蟹天婦羅($128),外脆內軟,層次分明。

 

仲買人精選特上刺身($498),包括海膽、吞拿魚等七款刺身,每日由日本直送,鮮味無窮。

 

巷仔教路

Philip咁好打,但劇中愛打拳嘅Tiffany就成為佢嘅技術教練。Tiffany笑言,其實係Philip教番佢先啱。「去菲律賓拍攝嘅場口,對我嚟講係好大嘅挑戰,因為我要一個人喺條街打十個武師,係Philip幫我設計晒所有打鬥場面,嗰個moment真係好難忘。一嚟因為我好緊張,二嚟嗰區好難拍,再加上又要記唔同嘅step,記錯一個都阻住拍攝進度。

「好在返到酒店後,我有個roommate Kaman,有佢做我嘅沙包,如果有十個step,我就叫佢配合我,成晚係咁練習。有時Philip會喺酒店隔籬條巷仔,同我run-through啲steps。」

不過同Tiffany最多對手戲嘅,又係楊明,之後佢哋仲會有感情發展。

因為baby face而經常飾演中學生,Kaman今次終於有突破,值得關注。

 

嬌小嘅Kaman能夠同王浩信「平排」,全靠工作人員「出手」相助。

 

Philip以打聞名,劇中自然有情節,俾佢一顯身手。

 

超豪華卷($180),集三文魚籽、海膽、帆立貝及吞拿魚茸於一身,一次過品嘗唔同嘅鮮味。

 

和牛鐵皿燒($268),選用黑毛和牛製作,嫩滑味美。

 

海膽汁燒蠔($98),係傳統嘅沖繩美食,海膽汁更能帶出蠔嘅獨有味道,值得推介。

 

零食喼神

講番Kaman,劇中佢要做王浩信嘅貼身保鏢,最初兩人係冤家,但相處耐咗,就產生咗化學作用。「有一場戲係我好難忘嘅,講浩信暈低入咗醫院,我為咗要令佢醒番,我喊住打佢塊面,其實我好驚用錯力打親佢,而第二日拍佢打番我三十幾拳。哈哈!」

而Tiffany同Philip仲爆料,前者話:「我哋出兩次trip,一次去菲律賓,一次去英國,兩次Kaman個喼都overweight,原來入面全部都係零食!哈哈!不過佢係我最好嘅雪糕腳,出trip嘅時候,我哋日日都食雪糕!」

Tiffany身形高挑,係新一代小花嘅代表人物之一。

 

我一直好欣賞Philip嘅身手同專業精神,期待同佢日後有合作嘅機會。

 

角色熱愛打拳,Tiffany仲以一敵十,相當有睇頭。

 

明太子蛋卷($75),嫩滑嘅蛋卷內裏為明太子,兩者100%配合。

 

特製法式吐司($78),吐司外面為帶甜嘅脆皮,內裏極之鬆軟,配上雪糕、香蕉,一口就享受到性價比高嘅甜品。

 

目利きの銀次Royal Grill 地址:旺角太子道西193號新世紀廣場3樓367號舖 電話:23920028