入行快十年的王梓軒，唱而優則演。近日，他在劇集《是咁的，法官閣下》中，跟拍檔梁烈唯大玩兄弟情；不過，現實中，他卻一直跟經理人、薛家燕大女石祐珊（珊珊）的緋聞沒完沒了。

日前，家燕姐在社交網為珊珊搞了個「招女婿」廣告，吳業坤和洪永城都是名單之列。身為緋聞男友的王梓軒卻直言無報名，強調跟珊珊只是朋友和工作夥伴，有意撇甩「家燕姐女婿」身份。此外，本刊還發現他轉冧鄧佩儀，在九龍灣的碼頭偷偷熊抱女方，似乎有啲嘢喎！

王梓軒跟鄧佩儀在無綫新劇《機場特警》中有感情線，二人日前在九龍灣的公眾碼頭拍攝拍拖戲，情景浪漫。

現場所見，鄧佩儀似乎有點傷心，於是，王梓軒主動向她送上抱抱，並輕撫她的秀髮。

從未撻着

家燕姐在社交網為大女珊珊，搞了一個「招婿大會」，反應熱烈，對於已「報名」的吳業坤和洪永城，她笑言二人的條件都不俗，唯獨衰「多心」。至於珊珊的緋聞男友王梓軒，她再次澄清二人並非拖友。

另一邊廂，孭住「家燕姐女婿」身多年的王梓軒，日前出席《歡樂滿東華》記者會時，就向本刊表示，雖然他自己無「報名」，但有留意兩位星級「女婿」候選人，「坤哥年初先向家燕姐展開攻勢，o依家又轉向珊珊；而洪永城就識o氹女仔，真係想睇佢哋點樣施展渾身解數。」

他強調跟珊珊合作至今八年，未有擦出愛火花：「珊珊係我經理人、係知己好朋友，我哋之間有互信、有友誼，但似乎就係冇愛情！我哋真係冇，呢個問題都被問咗一百次以上啦！」至於就珊珊的幸福，他就直言不用擔心︰「珊珊咁好條件，好多人追o架！雖然我冇問過佢，但有時大家做完嘢，我哋會分開走，因為佢話約咗人，但就未畀我『斷正』！」雖然做不成家燕姐的女婿，但他跟家燕姐仍合作無間，並會擔任她的演唱會嘉賓。

薛家燕的大女石祐珊跟王梓軒的緋聞傳了近八年，家燕姐也大讚他是好男仔，可惜跟女兒未有擦出愛火花。