為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 12 月 08 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

點止小兒科

衍生集團(6893)今年創立二十二周年,最近公司主席彭少衍傳來短訊,原來佢哋品牌產品連續八年成為香港銷量第一。彭兄除咗報喜仲話多謝各大連鎖店支持,但事實上公司過去喺研發同品牌方面落咗唔少工夫,而且由二○一三年開始已經得到香港名牌標識,基礎好扎實。

衍生集團主席、彭少衍伉儷(左、中)。

認識彭兄好多年,兩年前同佢做訪問,當時佢分享公司未來發展方向,要由藥品擴展至婦嬰中醫服務。循住呢個方向,第一間中醫門診已經在二○一七年六月喺沙田石門開業,之後再喺內地設立診所,開始醫藥雙線發展。

彭兄係我老鄉潮州人,本名其實係彭少延,一九八五年嚟香港過關嗰陣,關員問佢叫咩名,佢講潮州話關員唔識聽,就變咗彭少衍。佢講笑咁話諗番轉頭,好想多謝當日嗰位關員,如果唔係佢搞錯咗個名,就唔會衍生咗今日嘅衍生集團。計我話,以彭兄嘅創業家性格,公司一定會創立,不過個名可能唔係「衍生」而係「延生」。

過去,衍生業務不斷按市場變化而轉型,由早期嘅個人護理、護膚品代理,到二○○四年開始做自家品牌並生產藥品,一邊探索一邊調整業務,至奠定今日以兒童保健產品作為主打嘅業務模式。o依家提到開奶茶或者七星茶,「衍生」係top of mind品牌之一。

我好認同一個企業要有自己嘅主攻市場,仲可以藉此建立鮮明形象。我問過彭兄,公司創立自己品牌後開始做藥,但點解揀兒童藥品?佢解釋,公司一開始係做冬蟲夏草、靈芝孢籽之類嘅保健產品,但市場上成人產品比較多,市場競爭大,於是做調研,最後揀定兒童產品,睇好中國嘅一孩政策遲早會開放。內地醫藥行業估計,到二○二○年,兒童健康產品市場規模可以達到二千多億元人民幣,行業可以話係處於發展嘅最佳時機。

至於衍生喺咁多兒童藥品之中揀咗開奶茶同七星茶做主打,主要係當時調查發現,大人最關心小朋友兩件事,就係食飯同瞓覺。兩種茶都係傳統藥方,但煲藥麻煩,所以衍生就做顆粒。推出時更用公主少爺做廣告,包裝西化,結果順利打開市場。中醫健康中心亦有針對兒童常見問題而提供相關服務。

睇返公司嘅中期業績,衍生以往委託供應商代工生產,但正喺廣東省雲浮市興建生產廠房,預計二○一九年年中落成,屆時轉為自家生產,不但可以降低生產成本以及增加效率,仲可以更嚴格控制質量。品質係品牌嘅根基,自家製造係進一步發展嘅關鍵。

另外,公司九月底止六個月嘅電子商貿平台收入約一千萬港元,仲係處於起步階段,但網上購物日益盛行,公司會增加放上網銷售嘅自家品牌產品,希望能夠增加來自網購嘅收入。

兒童健康係個人成長嘅基礎,衍生幫兒童打好個底,同時幫公司打穩根基,小兒科其實唔簡單。