為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 12 月 02 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

拍住上

夫婦同心,點止斷金?吳岱融(Hugo)同鍾淑慧(Lily)結婚廿三年,係圈中著名嘅恩愛夫婦,家庭生活幸福美滿,最近二人仲喺事業上再次同步,簽約「邵氏」。

今次「Paco巨星飯堂」,我邀請吳生吳太,去到位於銅鑼灣嘅「胡爐」,品嘗特色嘅fusion火鍋,暢談二人結婚多年,維持幸福嘅秘密。

Hugo同Lily唔止生活步伐 夾足廿幾年,最近佢哋連事業都拍住上,一齊簽約成為「邵氏」旗下藝人。

 

我們仨

Hugo同Lily彼此都相當了解,而且二人同為娛圈中人,夫妻間唔愁冇話題。Lily話:「我哋可以分享大家嘅工作,我老公好多嘢都會同我商量,例如應該點樣演某一場戲,所以大家有好多偈傾。」

由愛情昇華成親情,Lily關心嘅已經唔係承諾,而係老公。Hugo就話:「有時我都會介意,自己冇能力令老婆更好嘅生活,我唔想見到佢唔開心,我只係想佢開心!」

講就咁講,但其實夫婦二人覺得,只要身邊有對方,就鹹魚白菜也好好味,Lily甜笑表示:「時間過得好快,同老公一齊咁多年,整體係開心嘅。一對夫婦一定有吵吵鬧鬧嘅時間,或者係小風波,有波折、有矛盾,風平浪靜係冇可能,不過我哋遇到嘅都係小事,而且我哋個人都好簡單,人簡單就會幸福。我哋都有共同嘅觀點,明知道快樂並唔係建立喺金錢上,所以咁多年來,我哋都係幾好嘅。」

恩愛夫婦嘅另一個「共同觀點」,就係二人嘅囝囝吳政樺(Justin)。一講到囝囝,Hugo即刻展現慈父樣,「個仔服完兵役,返嚟香港一陣,之後會返番新加坡讀書。我教仔冇特別方式,但係時代唔同咗,我唔會用我爸爸教我嘅模式,套用喺佢身上,一家人開心就夠嘞!」

我帶吳氏夫婦去到位於銅鑼灣嘅「胡爐」,品嘗特色嘅fusion火鍋,暢談二人結婚多年,依舊恩愛如昔嘅秘密。

 

二人嘅囝囝政樺,已經二十一歲,今年喺新加坡服完兵役,就返港同父母同住。

 

青紅麻辣豬手鍋($228),一邊為紅花椒及四川秘製麻辣油,炮製嘅傳統麻辣,另一邊就係以青花椒製作嘅台灣寶島青麻辣,兩邊都有秘製豬手,嗜辣者必試。

 

火焰龍蝦鍋($398)係以傳統製作嘅法式龍蝦湯作湯底,用波士頓龍蝦、洋蔥、番茄及卜卜蜆炮製,先品嘗湯汁再用作火鍋之用,一鍋兩食。

 

自家製黃金魚皮($88),鹹蛋黃同魚皮「雙劍合璧」,啱晒佐酒。

 

實力派

而Lily就話:「我想多啲陪個仔o架,因為我哋喺佢細個嘅時候,都忙住做嘢,錯過咗好多佢嘅成長過程,雖然o依家佢咁大個,但係我都想黐住佢o架!呢個(望向老公)係我大仔,嗰個係我細仔,兩個仔我都要照顧。」

「細仔」返新加坡讀書,Lily初時會進行貼身照顧,而「大仔」就留守香港拍劇。「我好好彩,遇到好多好角色,除咗之前嘅『鷲哥』有發揮空間,之後喺電視劇、電影,都能夠令觀眾留下深刻印象。

「其實我一直都想演喜劇,嚟緊會播嘅《牛下女高音》,就係輕喜劇嚟嘅,有King Sir鍾景輝、曾航生、韋家雄等,全部係好對手。」

影視之外,Hugo仲熱愛唱歌,佢即將喺12月中遠赴加拿大,擔任當地華裔小姐選舉嘅表演嘉賓,會開金口獻唱。

 

「鷲哥」一角後,Hugo以演技獲得大眾喜愛,其後佢(中)喺《飛虎之潛行極戰》中,都係以奸角出位。

 

電視劇外,Hugo亦有兼顧電影演出,六月嘅時候就參與《廉政風雲煙幕》嘅演出,同影帝劉青雲合作。

 

自家製醉鴨舌($88),相當滋味。

 

胡爐牛拼盤($498/大),集各式牛肉於一身,包括日本A5飛驒和牛、頂級牛柳粒、和牛肉芯、本地手切牛及安格斯手切牛,一次過嘗盡各種牛味。

 

黑松露蟹肉餃($128)亦屬自家製配料,餡料包括黑松露、蟹肉、洋蔥及雜菇,鮮味!

 

有煮見

演技以外,Hugo喺廚藝上都係一樣出色,Lily自愧不如話:「因為屋企有我媽媽掌廚,加上我要做嘢,所以好少下廚。(Hugo:「但係你煲湯好叻!」)哈哈!我鍾意飲湯,所以會煲湯滋潤吓嘅。」

而Hugo嘅拿手菜式,原來都係同囝囝有關。「因為阿仔細個嘅時候偏食,唔肯食蔬菜,咁就令我變咗炒飯專家嘞!我將所有材料,紅蘿蔔、洋蔥、菜全部切到細細粒,再同啲飯炒埋一齊,仲改埋名叫『Daddy炒飯』,咁個仔嘅飲食就可以保持均衡營養啦!」

囝囝已經達「鮮肉」年紀,Lily都放心繼續工作,到橫店參與內地網劇演出。

 

Hugo keep得好,除咗因為有Lily嘅愛心湯水,佢一得閒就每星期同明星足球隊踢波,保持運動量。

 

夫婦二人同一眾識於微時嘅圈中好友,如歐陽震華、張兆輝、郭政鴻、鬼塚等,經常相聚,充滿歡樂氣氛。

 

鵝肝蝦丸拼黃金墨魚丸($118),各有特色。

 

甜品有迷你雪糕蛋糕($68/個),有朱古力、士多啤梨、雲呢嗱及芒果(前至後)四款口味,以供選擇。

 

胡爐
地址:銅鑼灣耀華街3號百樂中心3樓
電話:27572988