為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老作有理 2018 年 11 月 30 日

林作

讀過哈羅公學、牛津、港大,是一位前大律師,可能是娛樂圈學歷最高嘅人,好認真咁滲透住濃濃嘅膠味同不可解釋嘅幽默。

我媾女勁的原因

由於近排英文教育事業蒸蒸日上,以及個人形象由於堅持而愈來愈被廣泛認可。最近多咗好多學生喺ig問我如何可以提升英文水平,尤其係口語及寫作?

嚟上我堂就最實際,你學嘅唔單止係英文技巧咁簡單。學嘅仲有我嘅思考方式、為人處事風格。唔單止幫到你學英文,仲學到點喺呢個世界生存。好多學生需要嘅,其實係一個不同嘅role model去啟發佢哋。

唔想花費時間精力嚟跟我上堂,但又想喺我身上偷師嘅。咁等我在此重複,其實我已經喺無數個free talk及自己嘅班學生裏面講過嘅——去YouTube睇訪談。

我強調,冇任何其他方式更有效,也冇任何方式係更輕鬆。當年「靈格風」廣告打得太猛,估計吹水成分高——短時間幾個月聽完就識得一種新語言,太誇張。但聽一個有一定基礎嘅語言,然後深化了解英國人係點樣喺日常生活使用佢哋嘅語言,呢個係真正提升能力嘅唯一辦法。

語言係用嚟溝通嘅。我媾女勁,係因為我語言能力好,油腔滑調。我要媾仔,一樣得,冇分別。因此睇訪談係最佳學習英文方式——佢最真實展現該語言如何被使用。
香港學生最弱嘅,其實係語感。聽得唔夠,講得仲少,難怪你寫嘢唔順,講得唔通。

不過冇可能喺留喺香港嘅情況下,日日走去蘭桂坊搵鬼佬「挑機」:‘Yoyo, I want to practise my English, please talk to me.’

當年我去到英國留學,其實口語能力也好低。係咪靠係咁同人講嘢呢?唔係,嗰個程度講多錯多。反而多聽、多留意、觀摩,最後模仿,先係我致勝之道。

我TVB女神吳沚默同我講過,剛開始想做好戲,搵到最適合模仿嘅演員對象係關鍵。做到個模仿對象感覺,你就似樣喇。學英文其實一樣,我曾經喺一個論壇上被陳淑莊話我講嘢似 Hugh Grant,這不是無獨有偶的。

三種人物嘅訪問最值得大家睇:政治家、演員、律師。因為佢哋都係要清晰咁同觀眾溝通。

以下係我準備嘅一系列名稱,大家將佢哋個名打入YouTube,初入門嘅可以加BBC,睇吓佢哋喺英國各大台接受嘅最正統派「講清講楚」類訪問:

David Cameron (former Prime Minister)
、Peter Mandelson (former senior minister)
、Hugh Grant (actor)
、Boris Johnson (foreign secretary)
、Chris Patten (former governor of HK)
、Amal Clooney (barrister)
、Lord Neuberger (judge)

注意,以上全部係英國人兼牛津畢業。

睡覺前、搭車時、痾屎嘅時候,睇十分鐘左右,持之以恆,同「靈格風」效果差唔多。記住,YouTube可以自己幫你出字幕。開埋字幕睇,唔識嘅字用電話apps「有道詞典」即查。

要提升英語,最重要係聽得多。