杭州第十一景

最近去咗一轉杭州，不過唔係去欣賞西湖十景，而係參觀市內第十一景之房地產。兩年前我已經聽越秀地產（0123）嘅老友姜永進（Michael）講集團計劃大力發展杭州，當時亦曾到此一遊了解規劃。早前再去一睇，計劃中嘅商住發展都已逐步落成，部分已經入伙。

越秀選擇杭州作為策略發展重點，係睇中佢有「景」。以經濟量計算，杭州喺過去幾年一直穩居全國前十，二○一七年全國GDP逾八十萬億元（人民幣，下同），按年增長百分之六點九，杭州GDP則增長百分之八，超過一萬二千五百億元；如果計入嘉興、紹興同湖州嘅杭州都市圈，GDP近二萬五千億元，接近浙江省全省一半。人均GDP十三點五萬元，已達到富裕國家水平。不過講到房地產，杭州起動較慢，雖然過去幾年量價都有升，但整體商品房成交單價比起好多大城市都仲有「水位」。

樓係畀人住嘅，咁睇樓市當然要睇人口，特別係年輕人口嘅增長。舊年杭州新增人口二十八萬，全國排第三，人才吸引力指數更加係全國首名。能夠吸引人才流入，同當地景靚宜居、學校林立固然有關，政府嘅人才政策亦起到極大推動作用。

成功搶到本地同國際人才，當然同當地經濟發展有關。係人都知杭州係阿里巴巴嘅總部所在，而多年嚟積極發展電子商務和其他新經濟產業，令佢成為電子商務之都，無論網站流量同移動支付都排全國首位。喺阿里巴巴同屬下企業帶動下，杭州獨角獸公司數量亦僅次於北京和上海。年輕族群鍾意投身新經濟，杭州絕對係北上廣深以外最有吸引力嘅發展之地。

有經濟和人口層面嘅配合，越秀商住雙線發展，其中維多利中心位於錢江新城金融中心區，喺正錢江前面，亦係區內首個寫字樓項目。維多利中心地上面積逾二萬二千平方米，主要有兩棟高層寫字樓，其中一棟已經售罄，集團留返一棟作收租用途，二○一七年六月交付，到今年八月出租率八成八，平均租金每平米一百零六元，新簽租約一百二十三元。項目交通方便，將有兩個地鐵站分別喺二○二○年同二○二二年開通。

我亦參觀咗招商越秀公園1872同埋越秀招商天悅江灣，都係越秀近期推出嘅樓盤。兩個都係大盤，建築面積分別係二十三萬幾同三十七萬平米，先推出八棟同五棟，預計二○二○年交付。天悅江灣仲配有豪華會所，裡面有恆溫泳池、室內籃球館、健身中心，以及多功能、老年活動和兒童活動中心。

杭州數字普惠金融指數全國第一，有興趣去住嘅話，先要習慣「杭州模式」，無論買餸、食飯、搭公車都唔使用現金。有報道話有人由北京搬去杭州住，喺機場撳咗一萬蚊，四個月後仲用剩八千幾蚊，杭州真不愧為「移動支付之城」。