各覓地選項叮噹馬頭　土地小組拗餐死

擾攘幾個月嘅「土地大辯論」公眾諮詢終於去到整理緊數據嘅階段，務求喺下月底前向政府提交最終報告。小組先後共收到逾六萬五千份書面意見、二萬八千份網上意見書，以及三千個電話訪問，合共有一百二十萬條數據資料，目前只完成部分數據嘅統計。

任憑市民剔點心紙方式嘅諮詢到底得到咩結果？消息人士話，初步數據發現大部分覓地選項都獲過半數人支持，只有施政報告提及嘅公私營合作支持度較低，因爭議性大，難獲大部分市民支持。有政壇中人就分析，呢個結果並唔令人意外，「公私營早已被妖魔化，點會支持？但就係最快可以得到士地嘅方法之一。」

其餘各選項，以最難收回業權嘅發展棕地嘅支持率較標青，有八成人贊成；東大嶼填海則有六成支持，「基本上，大部分選項都旗鼓相當，所以民意已變得唔係關鍵性，反而係要諗可行性及成本。」

消息人士形容，將數據化成有啟示作用嘅資料係最艱巨嘅工作，日前小組召開會議，就用咗大量時間討論點先算可行性高，成本低，結果係拗餐死卻難有結論，「小組雖然由好多專業成員組成，但判斷時難免有主觀性，而且成員嘅意見唔代表公眾，與公眾意見有很大落差時，又應該如何解釋？」

據了解，部分小組成員個人有立場，單係人工島計劃已經有唔少擁躉，有持支持意見嘅小組成員話：「有人擔心工程造價貴，但用我嘅分析呢個計劃嘅回報，遠高於成本，解決咗住屋問題，也促進經濟，但公眾係咪認同我嘅見解就不得而知。」該成員話，報告應該只鋪陳所有數據同意見，抑或應該加入成員嘅立場同判斷，都花唔少時間拗。

據悉，小組希望將十八個覓地方案排列優次，但因為數據實在係海量，而且點樣釐定可行性又有排拗，所以小組擬加密開會次數，「之前幾乎兩星期開一次會，o依家要加至一星期一次，甚至兩次。」

小組主席黃遠輝期望，報告如實反映社會大多數意見，政府應該要從善如流，採納建議。

土地小組收集大批公眾意見，但點樣將數據變成有用嘅訊息？小組

公私營合作發展農地嘅方案雖然能較快有地供應，但喺土地大辯論嘅支持度相對地偏低，爭議性較高。

港大社會科學研究中心白景崇教授早前向小組匯報初步嘅數據結果，但小組仍未有頭緒應該點落筆。