為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 11 月 20 日

關慧玲

《東周刊》社長兼總編輯。

「鋼閘」榮休了

香港警察學院日前結業會操,硬錚錚的場合,卻因為主持檢閱儀式嘅警務處副處長(行動)劉業成即將榮休,加添幾許人情味,會操隊伍特地為他進行三歡呼儀式,畢業學員一齊舉警帽向佢致意。

三十四年警隊生涯,劉Sir做過刑事調查、人事管理、行動支援等崗位,又借調去過機管局,管理機場航空保安。○六年晉升為總警司,並在一○年晉升為警務處助理處長,一三年晉升為警務處高級助理處長,一六年晉升為警務處副處長(行動)。 佢致辭回顧警隊生涯時,感謝警隊對他的栽培,話能夠在一支專業、有承擔及精益求精的警隊成長係畢生榮幸,說到這,一度哽咽。

劉Sir確是性情中人,佢嘅同袍都話,劉Sir外表極cool,唔識佢嘅會畀佢嚇死,識佢至知佢古道熱腸。

劉Sir有個別名叫「鋼閘」,皆因坊間有間賣鐵閘嘅舖頭叫業成。不過作為行動處主要指揮,呢個名又幾反映佢性格,確有點像一夫當關,處理大型示威行動他可以說經驗豐富,最為人熟悉嘅就係處理佔中事件。有識佢嘅人爆料,話一四年佔中七十九日,喺呢項史無前例嘅大型群眾行動中,佢在總部駐足七十九日,幾乎無返過屋企。擺張摺牀在辦公室,日以繼夜工作,累了就睡下。不為人知的是,期間劉Sir仲頻密落區探視在前線執勤嘅同事,當中有兩次佢仲相當激動。

其中一次是在佔中初期,有人群包圍政府總部,在裏面值勤嘅警員不能出入,連送飯車,甚至救傷車都話要搜過先畀通過。另一次是在旺角,佢去探一班剛轉更的同事,大部分筋疲力盡軟攤地上,當時就有記者影到佢激動得眼泛淚光。

劉Sir(中)檢閱後,由一哥(左)陪同為警察學院的貴賓紀念冊簽名留念。

香港不是未遇過大型示威,例如○五年的韓農示威。不過就算幾激烈,對壘的都只會是警察與示威者,而且歷時也不長。反而在一四年那個扭曲的時空裏卻有點像內鬥,警隊成為各方政治角力磨心,執勤時被部分香港市民辱罵、挑戰其執法權威,箇中艱難不足外人道。有警官說,那時刻,要做好多可能是好乞人憎的決定,但為了公眾安全,醜人也要做,這就是當年劉Sir,以致整個警隊無奈之處。原來在佔中事件過後,劉Sir落晒所有區,聽前線人員訴心聲。

佔中事件後,警隊積極加強警民溝通拓展社交平台,呢個亦係劉Sir全力支持嘅政策,早前警方為機構籌款搞「單手掌上壓挑戰」,得到在電影飾演副處長的演員梁家輝響應,拍片做了三下;點知劉Sir好玩得,以「真副處長」的身份做足十下。呢段「真假處長大挑戰」短片有七萬人次睇過,過千人讚好。

「鋼閘」臨別贈言,話警隊不是一份工作,而係一份使命,意味深長。隨着「Auld Lang Syne」音樂響起,劉Sir徐徐步下典禮台台階,他的人生,正式踏入另一階段。

香港作為世上最安全城市之一,優良的警隊是核心。靠的不是一個人,而是好多個像劉Sir般的熱血香港心。