兄弟班創業班

華納、萊特航空、家樂氏、迪士尼，呢幾間家傳戶曉嘅企業，背後都有一個共通點，就係兄弟班創業。事實上，兄弟創業例子好多，成功嘅亦唔少。到底係兄弟同心，其利斷金，定係企業家嘅基因喺家族相傳，真係搵唔到相關統計數據。但係唔少管理學者都就住呢個主題做研究，睇下兄弟企業嘅優勝之處，同埋檢討箇中嘅Dos and Don'ts。我就同大家睇下專家點講，一齊上吓創業補習班。

中國人創業搵兄弟姊妹埋班可能比西方更普遍，我認識嘅企業中都有唔少，好似建滔集團（0148）張國榮同佢嘅兄弟姊妹、創立半個世紀嘅時代集團（1023）楊氏兄弟等，仲有剛在十月上市嘅獵頭公司KOS高奧士（8042）陳家健（Kevin）同孖仔細Jackson、Eddie。

專家教路，兄弟合作第一係要「和而不同」。可能有人會以為兄弟性情相近，所以至合作得到，但管理學者認為，兄弟企業要成功，第一條金科玉律就係要因應大家嘅不同特點，各盡所能。好似華特同三哥洛伊創辦迪士尼兄弟時，就好清楚兩人各自嘅專長，而且能夠分配不同崗位發揮所長。華特係一位夢想家，有無限創意，睇大局，有遠大願景，可以睇到同想像到建立迪士尼嘅可能性。相反，阿哥洛伊就係商人，睇到乜嘢係唔可能嘅，對預算同賺蝕非常敏感，擅長打理營運細節、財務和達成交易，令迪士尼嘅創立由夢想變成真實。

有一次同KOS主席Kevin傾偈，佢都有相同觀點。佢講起三兄弟，加埋同學兼共同創辦人周家偉（Raymond），真係日對夜對，一齊為公司努力。兄弟班底之中各人嘅性情都唔同，甚至可以話係南轅北轍，一個外向social，一個係細心暖男，一個鍾意湊客，一個擅長激勵團隊士氣。而正正因為咁唔同，至令大家發揮到各自優勢，令公司決策更平衡、思慮更全面。

第二係要「計較」。點解專家咁講呢？來自加拿大嘅托倫（Toren）兄弟共同創辦過幾間成功企業，仲一齊寫書，可以話係兄弟班嘅典範。佢哋認為兄弟姊妹合作，溝通最重要。好多兄弟會認為大家係屋企人，應該互相了解，有乜心照啦，唔應該將自己嘅期望同感覺講出嚟，以免好似斤斤計較咁。托倫兄弟認為剛剛相反，如果一個夥伴合作要成功，就先要放低呢啲假設，大家好似一般企業合作咁，坦白同公開咁講清楚自己嘅要求同意見。「Don't take your sibling partner for granted」，亦唔好假設由於夥伴係家人，就可以讀到你心所想。

我問Kevin，KOS創業到出年就第十年，中間一定經過好多高高低低，佢哋點溝通同達成一致意見？佢話講到開誠布公，原來唔止限於幾兄弟之間，成個團隊都樣樣講清楚。好似公司有乜重大決策，包括聘請高層等，都會同團隊解釋兼分析，做好lobbying至行動。呢班年輕企業家能夠將兄弟班理念擴展到成個團隊，以鞏固創業班底，難怪經過高山低谷，團隊都願意相隨。

千禧世代唔再係一言堂，我喺呢班後生仔身上見識到最update嘅管理之道。年輕企業家建立兄弟班底，創業和管理都有新的理念。