為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 11 月 25 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

安歌.龍記

音樂可以打破所有界限,所以即使許志安同劉浩龍,兩個都多才多藝,但一回歸唱歌老本行,佢哋嘅感受都特別深刻。

今次「Paco巨星飯堂」,我就帶兩位嘉賓,去到位於尖沙咀嘅「心鉄板燒」,品嘗特色嘅日式鐵板燒,暢談佢哋將音樂同生活融合嘅心思。

安仔同師兄份屬同門,又同時有新作出街,自然要互撐,為對方打氣。

 

新歌會友

安仔同師兄喺相若時段出新歌,後者嘅〈阿龍理髮〉,就安排咗四位素人蒙上雙眼,由師兄幫佢哋理髮,仲將過程製成短片,分享每根頭髮所背負嘅唔同煩惱。

「佢哋全部唔知髮型師係我,後來有個女顧客,要求將長髮剪短,當佢打開眼罩,見到自己嘅短頭髮,忽然眼有淚光。我以為係我剪得唔好,原來係佢喺之前一晚,同男朋友分手,於是佢多謝我幫佢剪走好多煩惱。

「我當時聽到眼濕濕,更加證明到,頭髮真係人嘅煩惱絲,就算你改變唔到身邊事,但你可以選擇轉換髮型、轉換心情,重新恤髮、重新出發,因為做人最緊要開心。」

而安仔就推出手語版嘅《流淚行勝利道》MV,喺MV中,佢同一班熱愛跳舞嘅聾人,以手語傳遞訊息。

「今日用個口講嘅嘢好少,但內心嘅感受特別大,另外我仲學咗好多手語,除咗〈流淚行勝利道〉嘅歌詞,仲有自我介紹、打招呼、讚人靚仔靚女⋯⋯其實共融就係咁,無論你身份係乜、身體有咩狀況,大家都可以和平共處,無分你我。」

我帶兩位嘉賓,去到位於尖沙咀嘅「心鉄板燒」,品嘗特色嘅日式鐵板燒,暢談佢哋嘅音樂經。

 

同一眾聾人拍手語MV,安仔話:「拍完呢個MV感覺好興奮、好感動。」

 

師兄為咗新歌,堅上場做髮型師,為人清理煩惱絲。

 

今次試食嘅係「特選二人套餐」($1,980,另加10%服務費),包括九道菜式,先有三款前菜:杞子果仁沙律(後)、芝士春卷(中)及山芋海膽(前)。

 

中南非鮑魚配紫菜柚子汁,帶酸嘅醬汁更能凸顯鮑魚嘅鮮味。

 

三款湯品為龍蝦湯(後)、松露磨菇湯及蟹肉元貝冬瓜湯(前),任擇一款。

 

再入紅館

安仔仲有另一個好消息,就係入紙紅館成功。「係呀!出年會開演唱會,入咗紙,已經得咗嘞!我對上一次喺紅館開,已經係一五年嘅事,今次係相隔四年再開,我聽到呢個消息都好開心!我都要申請咗兩次先成功,希望可以做好啲,今次只係攞咗幾日期,所以開極都係得幾場。」

安仔近來努力操肌,唔止係為咗開演唱會。「其實都想自己sharp啲同埋fit啲,因為有時都要拍廣告同埋工作,唔想因為開演唱會先嚟操,咁樣好似變咗工作咁。有時Paco你又會無啦啦話,下星期有個角色啱我做,我都要隨時readyo架。」

而安仔嘅歌曲,多年嚟嘅曲風都以情歌為主,o依家佢嘅新歌〈獅子山上〉,就以勵志為題材,為咗配合主題,今次佢仲搵埋Dear Jane合作。「我一直好鍾意band sound,近年都有同唔同樂隊合作。行山節主題曲,當然需要一首好正能量、好有energy嘅歌去配合主題,所以我第一時間諗起Dear Jane。」

平時安仔除咗做Gym都會行山,「我最鍾意同朋友帶埋寵物,由大潭行去紫羅蘭山,即係陽明山莊嗰邊。一邊行一邊傾,好舒服。」

明年底再次踏上紅館舞台,安仔難掩興奮之情。

 

為咗時刻準備好,迎接挑戰,安仔愈嚟愈fit,專業精神不得不讚!

 

加$400就可享用鐵板燒龍蝦,啖啖鮮香。

 

北海道鱈場蟹腳($328),要燒得不損蟹腳鮮味,極考工夫。

 

肌男勿語

忙於宣傳新歌嘅仲有師兄,但佢忙中依然持續健身,早前仲曬腹肌做封面男郎添。「今次Keep住減肥健身,身體已經適應咗,即使一晚食四碗飯都無問題。因為健身練到嘅肌肉,其實係可以燃脂,所以我唔怕肥番。咁可以食到美食,又可以Keep住好身形,我就梗係好開心啦。」

喺操肌嘅巔峰時期,師兄日跑八公里,再去做個半鐘頭gym,o依家佢照keep住做運動,保持肌男figure,「有靚身形就梗係好,但係我覺得減咗磅,成個人都健康咗,咁先係最緊要。」

歌影發展順遂,師兄話要繼續挑戰自己。

 

要保持肌男形象,背後必然要付出努力,而師兄亦都冇偷懶。

 

除咗剪髮,師兄仲試埋日本暴走族嘅髮型,製造話題。

 

甜品為紅豆抹茶小丸子配時令水果,份量啱啱好。

 

神戶黑豚厚燒加薄燒,各有千秋。

 

日本A4和牛厚燒及牛舌心,啱晒愛好品嘗牛不同部位嘅食客。

 

心鉄板燒
地址:尖沙咀亞士厘道17-19號18樓
電話:26572800