為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 11 月 17 日

劉小慧向「老闆」嘟嘴詐型

今年四十七歲嘅劉小慧,同草蜢嘅蘇志威(蘇老闆)結婚廿一年,育有兩個女,但係身形依然keep得住。聽聞,佢好識養生,又學中醫,久唔久仲會辟穀,所以保持健康同苗條。

不過,東姑早前喺機場撞到小慧;當時,佢同埋老公、大女出現喺機場嘅抵港大堂。雖然,小慧着咗顯得佢瘦啲嘅黑色衫褲,但身形睇落脹卜卜,好似增加咗唔少磅咁。唔知係咪因為同老公、囡囡出埠玩,實在太開心,所以旅行時放開懷抱盡情大吃大喝,搞到脹咗兩個碼返港?睇嚟又要辛苦去辟穀,去吓肥膩,兼順便keep fit喇!

現場所見,同小慧一家同行嘅仲有幾個男女友人;期間,更有同機服務佢哋嘅空姐,向佢哋揮手道別,明星乘客嘅待遇,當然係唔同啲。不過,蘇老闆睇落比較貴人事忙,出閘後差啲連老婆同囡囡都唔記得,第一時間只係掛住講電玩、覆訊息。成車行李就靠晒大女推,而老婆小慧睇落一臉無奈,嘟長個嘴同個女行先,似對老公作無聲嘅抗議!

抵港出閘後,蘇志威即刻急不及待掛住打電話,連空姐同佢道別都冇反應。

 

全身黑衫黑褲嘅劉小慧,睇落唔瘦,仲似脹咗兩個碼咁,疑似外遊時大吃大喝,增磅唔少。

 

老公蘇志威一路行,仍然一路掛住撳電話,成車行李就由囡囡代勞推。

 

畀老公冷落嘅劉小慧,十分無奈,仲嘟長個嘴加快腳步,同囡囡行先。

 

劉小慧同蘇志威結婚廿一年,兩人大女蘇君蕎今年十九歲,而細女蘇靖珺就十一歲。