習近平見代表團　消除邊緣化之說

國家主席習近平本周一喺北京人民大會堂，接見慶祝改革開放四十年嘅港澳代表團。習主席表示，國家改革開放過程中，港澳所處嘅地位獨特，作出重大貢獻，所發揮嘅作用不可代替，「國家發展取得舉世矚目的歷史性成就，香港澳門人士和在港澳的外資企業和人士都有一份功勞，祖國和人民永遠不會忘記。」

有政壇人士認為，中美貿易戰打得火熱之際，港澳代表團獲習近平接見，相信係因為港澳喺中國經濟國際化嘅過程中，發揮奠定性角色。

也有分析認為，近年有人擔心香港被邊緣化，但今次習近平親自接見代表團，相信係想用中國最高領導人嘅權威身份，肯定及凸顯香港不論係過去還是未來，都扮演重大戰略角色。

有與會者透露，習近平在閉門會議上提及希望香港融入國家發展大局，兩地人才多些交流，特別提到人心回歸是個過程，「急不得、慢不得」，但又引用詩句「明日復明日、明日何其多」，指凡事有規律和過程，但都「需馬上做起來，否則永遠做不成」。有政壇人士解讀，即係叫香港做嘢爽手啲呀。

港澳代表團獲習近平接見，凸顯香港、澳門嘅策略性地位。