為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 11 月 15 日

不滿法律學院表現偏低 港大嚴選新院長

香港大學法律學院院長何耀明下年約滿後不再續任,新院長遴選工作亦進入尾聲,遴選委員會本月底前會將最終人選交由校委會拍板。據悉最後兩強係曾任中文大學及城市大學法律學院副院長嘅內地學者凌兵,以及專研人權法嘅澳洲學者Simon Bronitt。

無論邊個當選都係新任校長張翔首次任命其新「內閣成員」,因為佢自今年七月履新後,一直沿用前校長馬斐森嘅內閣班底,包括一位首席副校長、五位副校長,以及九個學院院長。

消息人士表示,過去選院長程序較簡單,後來愈來愈複雜,今次更加搵獵頭公司物色人選畀遴選委員會。而且遴選委員會以前只有八名成員,包括四名該系學生代表及四名校方代表,但今次就加埋張翔落去,所以應該會有多數票出現。

今次選院長咁隆重其事,消息人士透露係因為校方不滿該系作為全港三間法律學院「老大」,近年不論係研究數量及排名都偏低,希望搵一個猛人重振該系嘅威望。

事實上,大學教育資助委員會早年廣邀全球學術界專家為本港大學進行「研究評審工作(RAE)」,顯示港大法學院研究工作評級大幅下滑。在研究項目方面,該系僅四成六研究被評為三至四星嘅「卓越標準」,遠低於中文大學法律學院嘅六成四,港大更有約百分之三研究被評為U嘅「垃圾級別」,有乜理由唔令校方關注?

另外,新任院長任重道遠,有唔少燙手山芋要處理,迫在眉睫係要處理該系副教授戴耀廷有關佔中事件嘅刑事審訊,案件本月開審,一旦罪成港大便要啟動紀律程序,屆時新院長勢必要頂住各方壓力。

有消息指,兩位候選人面試表現,以凌兵略勝一籌;同時有傳Bronitt早前協助港大進行模擬RAE,但成效平平,部分委員對佢有微言,不過佢對普通法嘅熟悉程度高於凌兵,「兩人各有優缺點,勢均力敵,似乎有得爭。」

除咗法律學院有人事變動,校委會主席李國章嘅任期下月屆滿,外界注視着特首林鄭月娥會唔會起用新人。

香港大學近年嘅排名下跌,法律系更失去亞洲「一哥」嘅地位,甚至被其他本地大學爬頭。

 

港大法律學院新院長一職成為凌兵(左)及Simon Bronitt(右)之爭,消息指佢哋勢均力敵,至今未分出勝負。

 

校委會主席李國章任期下月屆滿,會否獲續任成為另一個焦點。