為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 11 月 13 日

關慧玲

《東周刊》社長兼總編輯。

周永健係馬專家

聽過唔少人說,馬會新任主席周永健(下圖)對馬的知識屬專家級水平,上周六賽馬日與他一會,果然。佢開口就話睇好第二場練馬師麥菲文嘅「老實人」,結果真係不負眾望報捷。周永健笑笑口話邊有咁多貼士吖,謙稱只是睇得多又肯研究,「呢場賽跑千二,係呢隻馬強項,加上係練馬師麥菲文嘅告別戰……。」佢話馬會會員好多係專業人士,唔會就咁睇數據滿足,鍾意自己分析,當係考自己眼光,睇中咗在友儕間有排講。

周永健父親早年已係馬會會員,佢受父親影響細細個已鍾意馬。爸爸入馬場,佢太細唔可以跟入去,就央求司機車佢去跑馬地某個高位睇賽事,「當年有唔少人唔入馬場喺嗰度睇,好熱鬧。」之後佢去英國讀書,有更多時間睇賽馬,興趣與知識與日增長。

周永健本身擁有過唔少馬匹,全部以「感」字命名,包括快感、動感、御感、盈感、頌感、同感、勁感、好感等。究竟戰馬是如何打造的?周永健說有幾個基本因素,一是血統,睇佢父母戰績,二是視乎佢係母馬嘅第幾胎,「一般頭胎都較弱,去到第三四胎,母馬子宮完全成熟,隻馬較壯。」第三,當然要靠練馬師功力,還有騎師同佢嘅合拍程度。

有齊上述種種豈非贏梗?周永健指指自己心口,話同樣重要但也最虛無的,是「隻馬有無鬥心?」馬兒落到場唔願鬥,有一流血統一級練馬師都無用,佢試過買到平但死都肯跑的馬,就好似中獎般開心。

一般人養貓狗都會同佢哋互動,馬兒是否有靈性認得主人?周永健好肯定點頭,「佢哋見到我,會擺頭擺腦,叫聲也很特別。」那如何哄隻馬?周永健提供貼士,「輕撫眉心、馬頸、馬鼻。」

新上任馬會主席一職,周永健有唔少大計,包括做多些外交,即係與外國馬會交流,「其他地區會搞賽事,我到當地頒獎,也看看他們的設施。」佢話有會員觀摩過,覺得香港馬會無論在建設和飲食等方面都是最出眾。不過周永健話未滿足,仲要再做好啲。