中國式優質教育

香港中小學入學爭崩頭嘅情況，我哋早已見怪不怪，但我喺舊年同今年分別參觀過睿見教育（6068）嘅東莞和惠州學校，親眼見識過學校面試逼爆大禮堂嘅墟冚情況，至知道內地莘莘學子面對嘅競爭比香港同學有過之而無不及。

根據內地教育部二○一七年統計，全國共有各級各類學校五十一萬多間，在校生二點七億，其中民辦學校近十八萬間，佔全國三成半，年招生一千七百萬，在校生五千一百萬，按年增長超過百分之六。

內地中產崛起，負擔得起嘅家長願意每月花幾千元（人民幣，下同）學費，送仔女入民辦學校，其中一個原因係民辦學校師資較佳，而且採用較新嘅全人教育理念，令小朋友喺學習同其他體藝培養上都得到更好效果。

以睿見教育為例，由於全部學生都要寄宿，所以小學生已經要自己執拾梳洗，教出嚟嘅小朋友自理能力較強。而除咗強制規定嘅學科，睿見教育可以靈活開設額外選修課程，好似核心科目拓展學習，習慣及生活技能，個人發展，仲有音體藝，以及創新思維課程等等。喺全方位培養下，令過去連續三個學年，學校接近九成半高中畢業生被中國大學錄取，其中入到一等大學如北大和清華等嘅比例亦較高。

至於課外活動，相信中港家長同樣重視。喺香港，二○一七年投資者教育中心一項調查顯示，有近半數家長每月花費三千港元喺子女課外活動上，更有三成半花費達五千港元。內地家長同樣希望子女喺課外培養興趣，見多識廣。睿見辦嘅係寄宿學校，學生有更多時間參與廣泛活動，包括有籃球、田徑、武術、音樂、舞蹈及中國書法等，連高爾夫球和街舞都有得揀，學校亦可以引入更多非學費收入。

睿見教育係華南地區最大民辦教育集團，目前喺內地有七間學校，分別位於廣東省東莞、惠州、揭陽、遼寧省盤錦、山東省濰坊，以及四川省廣安。公司剛公布以二點七六億元投得佛山順德一幅土地，計劃發展寄宿中小學，可容納四千四百多學生，鞏固喺大灣區嘅優勢。

今年八月，司法部發布有關民辦教育條例修訂草案嘅送審稿，其中列出義務教育嘅公辦學校不得轉為民辦學校，而集團式辦學機構就不得通過兼併收購等方式控制非牟利民辦學校，令市場擔心中央政府會對民辦教育機構併購活動加強限制，或者會影響行業增長。

呢份文件令包括睿見在內嘅一眾教育股幾乎全線捱沽。不過最近有投行分析，認為新政策只係區分牟利及非牟利辦學團體，中央政府對民辦教育嘅支持並冇改變，而對已上市嘅教育股更接近零影響。另一間行亦剛出報告，睿見喺新學年表現達標，二○一八年九月底嘅總招生人數達五萬一千五百二十人，按年增長兩成半。預期二○一九財年營業額增長兩成半，超出市場預期。

我認為中國教育事業仍大有發展空間，隨着人民生活進一步改善，教育將會係國家重點發展和支持嘅行業。