為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老作有理 2018 年 11 月 16 日

林作

讀過哈羅公學、牛津、港大,是一位前大律師,可能是娛樂圈學歷最高嘅人,好認真咁滲透住濃濃嘅膠味同不可解釋嘅幽默。

是咁的,娛圈套上法界

大律師界同娛樂圈嘅生態係冇分別嘅。

細細嘅圈子,一千多人,等級制度分明,去個台慶之類嘅大型活動,企咩位都代表你嘅地位有幾高。

全行淨係有兩間「大律師樓」獨大,除咗極少部份好似曾志偉咁有江湖地位嘅大佬,可以唔喺任何大型「大律師樓」駐場外,其他人都係要靠「大台」搵食。

唔係「大台」嘅,又或者冇沾染過「大台」光環嘅,喺細行由頭開始,基本上係等運到、自欺欺人。

「大台」機會不斷,大project一個接一個,你要嘅,只係受捧嘅機會。你師父睇中你,就好似監製喜歡你咁,畀個大角色、好角色你,你馬上就一炮而紅。

唔喺「大台」嘅,可能自命不凡,覺得自己係金子。不過冇機會、冇曝光,你就注定喺自己個fans多又唔多、少又唔少嘅social media account上面自慰。

喺呢個世界裏面嘅人,大部份都極度充滿妒忌心、猜疑,冇真正嘅圈內朋友。因為,對方得到嘅機會,就係你冇咗嘅。對方得到嘅機會,又有幾多同實力有關?做得大律師、演員,其實一定有番咁上下功力。分別,就係喺人際關係嗰下。我叫呢樣嘢做「埋堆」,喺好嘅小圈子裏,自然自己友益自己友,機會多,然後因為其他人見到你多,所以畀你更多機會。

無綫新劇《是咁的,法官閣下》令人聯想到,喺娛樂圈同大律師界,有唔少相同之處。

冇機會嘅,其實喺兩個圈子裏面都一樣——死等,被動到不得了,然後大部份呢類人充滿負能量,係十分唔吸引人嘅拍拖對象。

呢類人係可悲嘅,因為佢哋對自身嘅肯定、生命嘅寄託,放咗喺事業有幾成功身上。

於是呢種人,更自負,更要將自己作為演員、大律師嘅身份擺得更高,更不可一世。因為除咗呢個身份外,佢哋覺得自己一無所有。

所以其實好多唔紅嘅大律師,根本得閒得很,每個月收入亦只不過係幾萬元。落得清閒,但大部份呢類人唔自在;然後,佢哋喜歡扮忙,做呢樣嗰樣「裝備」自己。

新入行嘅大律師,o依家每年有近百,但係生意量根本不足,更大比例嘅佢哋,需要面對呢個冇機會、紅唔起嘅問題。

師父們會話:「等多幾年吧!o依家係冇咁快o架啦!」

但其實好多新人都知道——根本唔會有成為下一個清洪嘅機會。就好似唔會有第二個達至張國榮高度嘅香港明星一樣。

所以見到班新人其實對未來十分徬徨。同佢哋出去飲下酒,你就明白嗰種壓抑。o依家新政策出台,允許大律師喺冇批准下做副業,增加收入。

有人問我,會否攞番個牌擺喺度?我話:「唔啦,我唔需要攞個牌嚟,先可以肯定自己存在嘅價值。」