為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 11 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

法外情

法律不外乎人情,所以以律師為主角嘅劇集,喺任何年代都咁受歡迎。最新熱播嘅TVB劇集《是咁的,法官閣下》,啱啱播出一周就掀起話題,全因人物、劇情貼地,觀眾自然有共鳴。

今次「Paco巨星飯堂」我就邀請劇中三位要員:黃智賢(Ben)、王君馨(Grace)同王梓軒,去到位於旺角嘅「重慶劉一手火鍋店」,品嘗高質素嘅重慶麻辣火鍋,細說劇集背後嘅「法外情」。

Ben、Grace同梓軒(左至右)喺新劇各有發揮,而且仲拍出真友誼,令飯敍現場笑聲不斷。

 

夠貼地

要數近年嘅「大律師」代表人物,Ben一定榜上有名,一五年播出嘅《四個女仔三個BAR》、一六年嘅《完美叛侶》,到今次佢都係飾演法律界嘅專業人士。「做到我好掛住件袍同個假髮,我唔知會唔會再有機會演律師,o依家好有使命感,回憶都返晒嚟,加埋見到Ophelia(Grace劇中名字),就更加有feel。

「我飾演嘅薛大狀,比上次《四個女仔三個BAR》嘅薛大狀,更加立體,更加人性化,因為今次嘅角色同傑哥(關禮傑)嘅角色,由讀大學鬥到出嚟做嘢,連我前妻Ophelia都會揀佢,咁我梗係會唔甘心,會表露軟弱嘅一面,而呢啲其實係好人性化嘅表現。」

「女一」Grace就話:「今次啲劇情同案件嘅連繫更加密切,好似當劇情講我同Ben嘅感情有問題,我哋要Handle嘅案件會令自己有反思,從而推進劇情。編審茜姐(李茜)做咗好多功課,我哋都去咗Court聽審取經。」

梓軒表示:「我同唯唯(梁烈唯)、麥明詩就飾演新仔大律師,平時喺啲師父面前就好聽話好乖咁,其實一班同Grade嘅新仔,去茶餐廳先會展現真面目,呢啲都係好貼地嘅情節。」

我帶三位嘉賓去到位於旺角嘅「重慶劉一手火鍋店」,品嘗正宗重慶麻辣火鍋,細說劇集背後嘅「法外情」。

 

Ben、Grace同傑哥喺開鏡前,同監製陳耀全都做足功課,所以佢哋一着起律師袍,真係形神兼備。

 

 

 

刺身盛,包括龍蝦($888/隻)、三文魚($48/四片)、赤貝($68/隻)、甜蝦($58/四隻)及八爪魚($48/四片),可隨個人口味配搭。

 

蜜瓜鮮果沙冰($98),以原個日本蜜瓜炮製,清甜解辣。

 

雙拼湯底:芫荽皮蛋($84)拼麻辣「中辣」($84),啱晒口味唔同嘅朋友。

 

Wrong Timing

Grace喺劇中跟Ben飾演夫妻,但一開始就見到兩夫妻關係觸礁,「劇集好貼地,觀眾一定可以搵到一個角色去代入,平時遇到嘅夫妻問題,都係劇情嘅一部份。不過,拍嘅時候我啱啱先結婚,呢頭生活仲係好Sweet,嗰頭就要我面對夫妻問題,Timing錯晒!

「我記得有次拍完返屋企,仲攬住老公喊,同佢話:『好彩你唔係咁咋!』。平時如果同老公嗌交,我哋都會祈禱,我覺得做人一定要謙卑,亦都要自我反省,咁先可以避免下次再嗌交。」

講到「老公」Ben,Grace表示:「Ben係一個好細心嘅對手,喺我同佢傾點樣去演嘅時候,佢會兼顧埋我嗰part,會俾一啲建議我,等我自己揀用邊種方式去演繹,所以我學到好多嘢。」

Ben話嚟緊會投入另一新劇嘅演出,劇集題材係浪漫愛情,真係要拭目以待。

 

除兩位「大律師」,一眾新仔喺劇中都非常搶Fo,梓軒、唯唯同麥明詩等眾生力軍,全部俾心機演出,係劇集另一大亮點。

 

 

 

串燒拼盤,有川辣燒豆腐($22/份)、川辣冬菇串($22/串)、香蒜什菌燒茄子($58/份)、川辣翠玉瓜串($22/串)、芝士焗蠔($38/件)、麻辣香蒜焗蠔($32/件)、川辣牛舌串($38/串)、川辣雞軟骨串($28/串)、麻辣汁燒豬柳串($38/串)、川辣雞腎串($28/串)、川辣雞中翼串($32/串)、麻辣汁燒羊架($58/件)及川辣霜降牛($48/串),種類繁多。

 

澳洲和牛極品特選($1188),包括M4/5澳洲和牛肩後肉、M4/5澳洲和牛板腱、M4/5澳洲和牛小排同M9澳洲和牛牛丸,每款都令味覺享受提升。

 

新挑戰

有老公錫番又有好對手,Grace仲同梓軒向來Friend底,一齊宣傳新劇外,仲合唱埋插曲,梓軒話:「我寫好首歌,做埋Demo,本來諗住低調啲去做成件事,點知後來先發現,套劇成隊crew都聽咗個Demo,早知就唔使咁神秘。」

合唱未夠喉,二人仲發起玩「10,000 Calories Challenge」,亦即係挑戰一日喪食,吸收10,000卡路里。Grace話:「我哋都有喺IG Po短片,梓軒又食炒蛋又飲香蕉奶昔,都只係食得3,000卡路里,我食公仔麵就仲少,只係食咗2,000卡路里,喪食完之後,我哋仲一齊踩單車Burn番,先可以盡快再食下一餐。」

Grace同梓軒相識十幾年,二人以兄弟相稱外,喺音樂上都有合作,《是咁的》嘅插曲〈夜曲17章〉,就係佢哋嘅兄弟結晶。

 

梓軒同Grace一齊挑戰一日食10,000卡路里,仲拍埋片記錄呢個歷史時刻,想睇佢哋食到幾犀利?就要去Grace嘅YouTube Channel:Grace Wong Official Channel嘞。

 

 

 

牛脷酥蝦滑($78),帶甜嘅牛脷酥,出奇地同蝦滑嘅味道互相配合。

 

黑松露丸($168),為自家製作配料,前為蝦丸後為墨魚丸,各有特色。

 

老闆天梯($238),天梯上有芋之果、川辣牛丸、北海章魚丸、蘭花乾、粟米貢丸、幸運元寶、台灣咖哩丸及香辣粉絲豆腐,夠晒豐富。

 

重慶劉一手火鍋店
地址:旺角亞皆老街16號旺角商業大廈2-4樓
電話:21111333 / 28029688