方力申密會中女歎High Tea

方力申（小方）同埋鄧麗欣（Stephy），喺前年分手結束十年情之後，從此各自各精采。舊愛Stephy如今已經有着落，同台灣藝人邱勝翔（王子）公開姊弟戀，兩人感情仲如膠似漆，喺公開場合或在社交網，都不時甜蜜「放閃」。睇番小方，回復單身之後，雖然緋聞一大籮，但係全部「冇米粥」。而近來，佢仲好似叠埋心水，專注發展佢游水學校嘅事業，除咗擔任校長之外，不時仲會親自教學生添！

日前下晝三點，東姑就喺中環ifc商場巧遇小方，當時見佢頭戴cap帽、身穿黑色T恤、牛仔褲，全身黑衣人咁嘅裝束，相當低調，仲一個人形單隻影喺商場行過。現場所見，佢邊行邊好忙，不停拎住電話傳訊息，睇嚟似係趕住佳人有約。結果，佢真係入咗間高級餐廳，仲好有閒情逸致咁點埋個三層架下午茶，悠悠閒同一個長髮紮馬尾嘅中女，一邊歎tea，一邊密密斟，傾到雞啄唔斷，搞到東姑都以為佢轉咗重口味，舊愛鍾意「弟弟」，佢就鍾意「姐姐」咁鬼爆？

不過，望真啲，同枱原來仲有一男一女友人，四個人似係傾工作上面嘅嘢傾得好投入，睇嚟小方暫時都仲係寄情工作多啲喇！

全身黑色衫褲，戴埋黑帽嘅小方，行色匆匆，睇嚟係刻意低調。

一路趕去餐廳方向嘅小方，邊行邊忙住發語音短訊，唔知同邊位佳人聯絡呢？

坐低背對餐廳門口嘅小方，同一個長髮中女密密斟好好傾。

同枱一共四個人，一邊歎住high tea、一邊傾公事，仲傾到指手劃腳添。

小方舊愛Stephy，同台灣藝人「王子」公開姊弟戀，兩人感情仲如膠似漆，喺公開場合定係社交網，都不時「放閃」。