大橋客逼爆東涌 逾半旅行團疑未登記
港珠澳大橋通車後第二個周日，出入境旅客人數首破九萬大關，入境旅客逼爆喺最近大橋嘅東涌消遣。
呢班旅客以跟團來港嘅廣州、珠海居民為主，部分人透露團費只需百多元，以咁低嘅收費，旅行團只安排佢哋乘搭公共交通工具去東涌玩，無法分流到市區或其他旅遊區。
咁點解兩地政府唔做好協調，限制團數及到港鐘數？香港旅遊促進會總幹事崔定邦透露，「正常程序下，內地旅行團訪港前要向旅議會登記，獲批才來港。當日無咁多旅行團登記來港，懷疑半數未登記，兩地政府控制唔到人潮。」
周日，經港珠澳大橋訪港嘅旅客塞爆東涌，大批旅客輪候巴士去口岸，旅遊業人士懷疑半數團未經登記。
