為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 11 月 09 日

醫管局新行政總裁 親和力煞食

經過幾個月嘅遴選,醫管局新任行政總裁人選塵埃落定,將由聯網服務總監高拔陞接替明年十一月約滿退休嘅行政總裁梁栢賢。據悉,進入最後四強嘅候選人除咗高拔陞,仲有兩位聯網總監陸志聰、羅思偉,以及一名海外應徵者。

雖然論年資,高拔陞不及其餘三人,不過佢做管理嘅經驗豐富,熟悉該局運作,而且親和力強,最重要係佢僅五十三歲,比其餘候選人年輕約五歲,如無錯失最多可做十幾年,有助穩定醫管局管理層,方便延續政策。

高拔陞冒升之快係近年罕見,佢屋企可謂一門雙傑,哥哥係著名骨科專科私家醫生高拔萃,而高拔陞九○年畢業於港大後一直在公立醫院工作,係一名老人科專科醫生,○八年由前線調到總部做醫療管理職務,當時已獲重點培訓為接班人。

真正獲管理層另眼相看係一四年調任為新界西聯網總監兼屯門醫院行政總監,當年該聯網經常因為工作量激增,資源匱乏而爆發工潮,有與高拔陞交手過嘅工會成員表示,「佢幾盡力回應醫護人員訴求,我們要求改善升職機會、增撥資源等都獲回應,有時佢還主動約見前線交流意見。」高拔陞今年四月才調回總部接替張偉麟做聯網服務總監,諗唔到半年左右又再升做阿頭。

高拔陞(左)將升任為醫管局行政總裁,接替明年退休嘅梁栢賢(右)。