為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 11 月 08 日

百人訪問團慶改革開放40年 富豪大孖沙齊隨團

今年係中國改革開放四十周年,過去四十年港商喺呢方面作出唔少貢獻,因此特首林鄭月娥本周六率領代表團訪問深圳及北京。獲邀隨團人士約一百二十人,都係對改革開放有貢獻嘅各界人士,當中不乏城中富豪及其第二代,估計該團有機會獲國家領導人接見。

據悉,林鄭擔任團長,中聯辦主任王志民擔任顧問,全國政協副主席董建華、梁振英以國家領導人身份參加。財政司司長陳茂波、政制及內地事務局局長聶德權、商務及經濟發展局局長邱騰華,以及特首辦主任陳國基將隨團。

其餘獲邀成員大致分為幾類,第一類係首批到內地設廠或投資建設嘅商界人士,據悉長和系創辦人李嘉誠、恒基主席李兆基、新世界主席鄭家純等都獲邀,佢哋大多派第二代出席,例如李嘉誠就以李澤楷做代表,四叔則派出李家傑出席。

今年係改革開放四十周年,據悉林鄭(前右六)將率團到深圳及北京,有機會獲領導人接見。

 

四叔李兆基(前中)係訪問團成員之一,佢個仔李家傑(前左)代佢出席。

另外,內地經濟開放後率先返內地開發電廠嘅合和實業主席胡應湘、首批到無錫投資棉紗廠嘅前全國政協常委陳永棋、八十年代已到內地設廠嘅永和實業創辦人林亮都獲邀。而前政務司司長唐英年、旅發局主席林建岳、行會召集人陳智思等,因為家族企業喺改革開放之初已率先到內地投資,所以都榜上有名。

第二類係金融界人士,據了解滙豐銀行副主席王冬勝、金管局前總裁任志剛、港交所主席史美倫、行會成員張宇人和廖長江、立法會主席梁君彥、立法會金融服務界議員張華峰等也有份出席。第三類係體育、文化界人士,立法會體育、演藝、文化及出版界議員馬逢國承認獲邀請。此外部分年輕運動員都係嘉賓之一。

行程方面,代表團將於本周六往深圳,參觀深圳改革開放展覽館,以及往前海參觀與改革開放有關嘅展覽和「標誌性地點」;代表團即晚飛赴北京,隨後兩日會先出席國家發展及改革委員會、國務院港澳辦共同主辦嘅座談會,重頭戲係下周一有機會見國家領導人。

李嘉誠(前左二)在改革開放初期已開始投資內地,但據悉佢會派兒子李澤楷出席訪問團。

 

行會召集人陳智思將代表父親陳有慶參與訪問團。