港人撐港劇，所以近期熱播嘅《跳躍生命線》，第七集經已錄得最高30點嘅收視！除咗馬神馬德鐘嘅魅力，劇中嘅「兄弟線」都一樣引人入勝。

今次「Paco巨星飯堂」，我就邀請「三兄弟」：何廣沛（Matthew）、郭子豪（Arnold）同張彥博，去到位於尖沙咀嘅「辣吧」，品嘗特色川菜，細說佢哋由劇集衍生出嚟嘅真感情。

Matthew、阿博同Arnold（左至右）因《跳躍生命線》成為好兄弟，連影相嘅甫士都要夾過，又點可以唔話佢哋sweet？

拍出真感情

對於劇集嘅佳績，三位嘉賓都歸功於題材特別，Matthew話：「劇集以救護人員做題材，係港劇好少見嘅，而且仲帶到一啲訊息俾觀眾，夠貼地外，又有馬神（馬德鐘）回歸，我都好開心有好收視。」

劇中嘅傑仔（Matthew飾）、雄姐（阿博飾）及六號（Arnold飾）嘅兄弟情，都係觀眾另一個話題。阿博話：「雖然現實中我哋三個嘅性格好唔同，但係因為拍呢個劇，我哋真係接受咗正式嘅紀律部隊訓練，由真正嘅阿Sir嚟訓練我哋，除咗令我哋入戲，仲會真係培養到實際嘅感情o架！」

Arnold話：「阿Sir鬧我哋係堅大聲鬧，步操都係堅操，本來有啲一心諗住一大班人去感受、去玩嘅，之後都好認真，唔係真係好難做到真正嘅team work。」

Matthew補充：「初時俾阿Sir罰，要即刻落地做二十下掌上壓，你（Arnold）就Ok啦！仲有步操，練提腿都要練成個鐘，我次次操完啲肌肉都好痛！」

我帶三位去到位於尖沙咀嘅「辣吧」，品嘗特色川菜，細說佢哋戲裏戲外嘅兄弟情。

因為拍劇令「三兄弟」真係拍出兄弟情，三人一有時間就相約操肌、相聚，癡纏過唔少情侶。

 

海鮮大咖干鍋（八款海鮮$328/位、六款海鮮$288/位），海鮮為師傅每日精挑當日最新鮮嘅食材，日日唔同，但鮮味十足，仲有三種辣度可供選擇；中間為唔辣嘅干鍋，極具特色。

印度鬼椒燴牛骨髓（$122），極級辣味同牛骨髓互相輝映，係嗜辣者必點菜式。

金湯肥牛（$98），牛肉煮得香滑，令人回味。

「柯南式」渴望

劇集受歡迎，三兄弟笑住「找數」外，各自都投入新工作，當中Arnold同阿博就會喺《法證先鋒IV》中再次合作，後者仲會迎來入行以嚟嘅突破。「我會飾演奸角，呢個角色係我從來冇演過嘅，好有挑戰性！」

阿博話畢，Matthew已經急不及待話：「我都想演吓奸角，入行以嚟我都未做過奸人，都想挑戰吓！」

既然講到「Dream Role」，阿博表示：「我都有想做嘅角色o架，我好想演一個偵探，抽絲剝繭破案嗰啲（Arnold：「你嘅外型有限制喎。」），咁做柯南囉，我打煲呔都幾好睇o架。」

為咗演出以七、八十年代為背景嘅新劇《黃金有罪》，Matthew話會再減磅，為藝術犧牲。

帝妃（$108）集伏特加、蘋果汁同檸檬汁等於一身，仲有淡淡玫瑰香，係專為女士而設嘅雞尾酒。

拍住馬神（前），Matthew話獲益良多。

蕨根粉（$56），爽口彈牙。

Matthew（前）拜Arnold（後）為師，健身操肌，一改斯文面貌。

大煙（$118）係有威士忌嘅雞尾酒，加入自家製嘅柚子蜜同玉桂粉等材料，味道特別。

操肌拍住上

拍劇以外，已有健身教練資格、八月贏得健美錦標賽冠軍嘅Arnold，仲為兄弟擔任私人教練，令Matthew同阿博成為「肌男」。

Matthew話：「唔係誇張，佢嘅訓練係全方位，堅有效！我一星期操五日，每次操四至五個鐘，除咗操之外，佢仲會兼顧埋我嘅飲食。喺嗰幾個鐘入面，我先操個零鐘，然後佢就俾一大碟西蘭花同雞肉我，叫我食晒再操，真係好快減咗體脂，見到成果。」

都係斯文慣嘅阿博，就俾「師父」盛讚：「兩個都好聽話好勤力，近排Matthew好忙，就少咗操；阿博就特別勤力，一啲都冇偷懶。始終健身係要喺唔同方面配合，先會有成果，而佢哋嘅態度，我完全滿意！」

贏過健美錦標賽，但Arnold話冇計劃蟬聯。「贏咗就OK嘞！為咗比賽我好辛苦o架，真係會食嘢食到喊！我唔想再經歷多一次呢個過程嘞！」

有份演出《法證先鋒IV》嘅Arnold，喺劇中飾演重案組探員，又有機會大顯身手。

阿博都即將投入《法證先鋒IV》演出，佢話新作嘅角色係入行以來首度演出奸角，心情既緊張又興奮。

 

已有健身教練資格嘅Arnold（上圖），一身肌肉足以做生招牌，而阿博都係佢其中一位「徒弟」，前者話後者夠勤力，相當抵讚。

三味無雙鍋（$328），三味包括麻辣鴨血、酸菜魚及水煮田雞，一次過試晒三種口味。

網紅海星（$128/份），以四川宜賓燒烤炮製，值得推介。

辣吧
地址：尖沙咀諾士佛臺1號一樓
電話：23630313/23637288