早年，有調查顯示，全港有多達六成五十歲以上的長者有俗稱「三高」的健康問題，即高血糖、高血脂和高血壓，長遠對香港的公共醫療系統造成沉重負擔。不過，今期的九十歲主角黃伯就發現只要養成好習慣，長命百歲其實無難度。

訪問當日，黃伯跟兒子阿貴來到觀塘翠屏邨的明愛觀塘長者中心，黃伯坐在電動輪椅上駛入中心，拍了拍大髀說：「我今年九十歲，三年幾前中過風，之後對腳就唔聽使，想做好多事都做唔到。」

九十歲的黃伯（前）自從參加計劃後，每天都控制血壓，生活變得健康，令兒子阿貴（後）深感欣慰。

中風緣於壞習慣

坊間已知的中風成因有很多，就如高血壓、食煙、飲酒等，而這三項成因黃伯通通都有。阿貴揭開黃伯輪椅旁的一個雜物袋，拿出一個乳酪膠樽，「入面其實係酒嚟，佢仲有食煙添。」他笑說。

不過，兩年前從外國回流香港照顧父親的阿貴指，黃伯當年之所以中風，皆因生活毫不節制，「試過血壓高到一百八十幾，生蠔夠膽死一次食三十隻，真係無佢符。」昔日食得放肆，黃伯中風後還曾跌到過兩次，令阿貴既擔心又感大壓力，「佢唔鍾意攞四腳架，係都只係攞支單腳杖，結果企唔穩就跌親，我同佢講再咁跌我就幫佢唔到，另一邊家人亦可能會怪我照顧唔好阿爸。」他續說。

不難發現，阿貴在照顧中風父親的事上可謂勞心勞力，「真心講開頭覺得好困身，同佢喺屋企亦會因為好多生活問題而嘈交，加上阿爸本身又固執，一嗌交就互相嬲對方幾日。」他的故事，也許是很多護老者的心聲，幸好在他頗感氣餒時，兩父子遇上明愛的家訪社工。

「社工問阿爸，有個計劃可以免費量血壓，全個中心得五十個位，問佢去唔去。」阿貴口中的計劃，指的其實是兩年前由香港賽馬會慈善信託基金策劃，並夥拍明愛等社福團體及中文大學推行的「賽馬會e健樂電子健康管理計劃」。計劃會以不同長者中心做單位，招攬五十名長者參加，「有部機可以量血壓、身高同體重。當我血壓高咗，就會有姑娘即刻打畀我，問我今日食咗咩早餐、點解會咁緊張，關心吓我都幾好。」黃伯說。

聽見黃伯力讚計劃，中心的社工連國亮卻笑指黃伯以往一直是區內的隱蔽一族，「同事閒時出去巡吓，經常見佢一個人在公園坐，唔鍾意同人傾偈，又嫌中心太多女人會講是非，所以好少來，反而一講到健康佢就一口答應。」

中心亦有舉辦肌力訓練工作坊，幫助老友記延緩衰老。

為了提升老人家運動的興趣，中心近年引入地壺球運動，並開班傳授。

改變換回健康

自從參加計劃後，阿貴笑指黃伯的生活即時有大轉變，「每朝七點幾就在中心門口做運動，行半個鐘同睇報紙，等到中心開門就自動自覺去量血壓，仲神心過返學。」此時，黃伯舉起手插嘴道：「家吓血壓跌返去一百三十幾，血糖就六度左右。」

不過，阿貴指黃伯對食偶爾仍會放肆，「一出街食就叫十二道菜，一鍾意食就食好多，於是一唔出街食，我就喺屋企煮得清淡啲，幫佢節制吓。佢煙都食少咗，家吓一日都係食一支，每次吸幾啖就整熄佢。」阿貴說。

一個量血壓的小計劃，除了令黃伯改變生活習慣，更重要的是令他變得健康，「本以為佢去到呢個年紀只會日漸衰退，點知佢精伶咗，人人見佢都話佢精神咗。」更令阿貴感驚喜的是，黃伯還因此日漸變得外向，「喺樓下見到中心啲老友記會打招呼，有時候佢同姑娘講秘密就連我都唔知。」他笑說。

對於黃伯的轉變，連國亮也舉起拇指力讚，「對啲血壓控制得好嘅老人家，我哋都會每月打一次畀佢，我哋稱之為乖仔Call。黃伯參加計劃開頭，血壓成日超標，姑娘成日都打畀佢，但近呢一年，姑娘每個月都只係打乖仔Call畀佢。」

雖然黃伯至今仍未能戒掉煙癮和飲酒習慣，但計劃卻令他學會樂天知命，「唔會逼自己一定要做到啲咩目標，個人無憂無慮，過得一日得一日，人就會開心，活到一百歲自然就無難度。」此時，他又拍了拍大髀，回了個笑容。

連國亮指借助計劃可讓社區內不少隱蔽長者重投社區。

老人家病痛多多，中心早年引入水療課程，助他們對抗痛症，結果成為中心的熱門活動。

長者常見三大問題

黃伯參加的計劃為期三年，中大則會分析收集得來的長者健康數據，了解不同社區的長者健康問題，明愛的安老服務高級督導主任崔允然指中心在計劃中期，亦有分析相關數據，「發現每十個長者，平均有三點幾個有記憶力衰退、口腔健康同衰老問題。」

崔允然指明愛於是在旗下十三個長者中心開辦不同課程，包括水療班、桌遊班等，「旨在訓練老友記嘅肌力、腦力同反應。日子有功，最近發現呢個平均數跌到二點八幾，都算有成效。」

香港賽馬會慈善事務部主管陳載英說：「計劃旨在鼓勵長者主動了解及管理個人健康，提升自理能力，在社區健康積極地度過晚年。」

崔主任指計劃成功令區內長者改變生活習慣，從根本解決健康問題。

賽馬會e健樂電子健康管理計劃

電郵：sekt@caritassws.org.hk
電話：2626 3189（「e健樂」明愛協調辦事處）