為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 11 月 01 日

胡應湘倡進取填海2,600公頃 專家:紙上談兵好易

特首林鄭月娥上任後第二份《施政報告》提出嘅「明日大嶼」計劃,建議喺大嶼山對出填海興建一千七百公頃人工島,外界就關注造價,擔心原材料、工程延誤等令庫房壓力爆煲。向來力倡填海嘅合和集團主席胡應湘豪言,一千七百公頃「小兒科」,建議喺東大嶼填海二千六百公頃,非常進取。佢仲話只要減少興建海堤,造價可大大降低。

政府一千七百公頃人工島計劃擬興建三十公里海堤,胡應湘就話海堤造價貴,起十幾公里就夠,「好像張枱咁,你(用海堤)包圍住佢,豈不是要用好多海堤?呢邊起一段,那邊起一段。」咁起法相信整體造價能降至二千二百億元。

佢仲話填海一千多公頃濕濕碎,認為香港應該喺大嶼山以東淺水區填海造地二千六百公頃,畀市民住大啲,「唔通我哋日後仲要人均居住面積維持十六平方米?」

胡應湘質疑政府高估海填造價,又認為填海一千七百公頃係小兒科,反建議喺東大嶼填海二千六百公頃。

 

「明日大嶼」計劃建議喺大嶼山對出填海興建一千七百公頃人工島,旋即成為全城焦點。

世界知名環境水力學者、科技大學土木工程講座教授李行偉認同填海係目前較可行解決長遠住屋問題嘅方法,但唔能夠貿然上馬,「紙上談兵好容易,要實際做得成,仲有好多問題要考慮。」

佢最關注係填海對大嶼山一帶航道嘅影響,「那兒好多兩地船隻出入,人工島係會影響船隻航道。」再者旱季期間,海水會湧到東江,人工島或令水位上升,會唔會令東江一帶水浸呢?仍然係未知數。

天文台前台長林超英最擔心為控制造價而減少興建海堤後果嚴重,「如果間疏咁起有罅,(洪水)就會入(陸地)。」佢指出全球暖化、水位上升係大勢所趨,最穩陣方法係成個島填高少少防洪。

胡應湘這邊廂力倡可以填大啲,但政府就似乎唔再講咁大。有建制派人士指,之前溫馨提示政府先講一千公頃,佢哋好做好多。近日便由發展局局長黃偉綸出來力銷,話集中處理交椅洲的一千公頃,而喜靈洲的七百公頃較「虛」,未有落實時間表。

對於胡應湘嘅減海堤建議,林超英有保留,佢認為水位上升問題越趨嚴重,不宜為控制成本而忽略防洪。