為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 11 月 03 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

花樣年的六角星

創立二十年,二○○九年上市嘅花樣年控股集團(1777)藉住九月舉行嘅周年慶典,重提公司名稱嘅由來,原來係表達品牌理念「花樣創造價值」,即係通過多樣化嘅產品以及人性化嘅社區生活服務,滿足核心客戶喺居住、營商、辦公、投資上嘅不同需求。

花樣年二十周年慶典之中最引起我注意嘅,係展出咗奧地利藝術家愛德華.溫科霍夫(Eduard Winklhofer)嘅《無題》,作品係用廢棄嘅檯創作一粒「六角星」。呢位藝術家專門用舊物件進行二次創造,至於六角形就象徵宇宙嘅協調一致,自然界中經常搵到,好似蜂巢咁,係一種結構穩定、排列緊密嘅形狀。

公司周年慶唔選擇富麗堂皇嘅裝置,而用六角星作為代表,好能夠反映品牌嘅內涵。同時,二○一七年係中國房地產轉型分化嘅一年,新政策、新調控措施不斷,房企賣樓受到影響之下紛紛尋求變革。六角星作品正好代表為舊事物帶嚟新意義,我相信花樣年係想展示公司建設新秩序同新生活嘅願景。

事實上,花樣年由地產開發起步,喺二○一七年以重資產模式突破全年合約銷售二百億元(人民幣,下同)大關,同比增長六成,今年頭九個月累積銷售額亦達到一百七十七億元。規模增長係花樣年過去嘅業務發展模式,但上到一定規模之後,就唔能夠單靠提高銷售嚟維持增長,公司就籌劃新嘅發展策略以求突破。

所以對於花樣年,變革已經部署多時。公司經過多年開發,已經建立起一個由不同社區組成嘅平台,並進而制定「社區+」戰略。房地產部門循呢個方向,發展咗六大業務分支:物業開發、租賃投資物業,物業代理、物業經營、酒店管理,以及文化旅遊等,實行輕重並舉。今年嘅中期業績可以見得到,五十二億元收入之中,輕資產收入佔比首次超過五成。喺內地房地產行業增速減緩之際,花樣年可謂率先落實轉型嘅先行者。

能夠及早計劃將業務轉型,固然得力於管理層嘅決策,但亦有賴過去開發嘅物業組成社區,令公司可以有一個廣闊嘅服務平台,發展輕資產業務。截至今年六月底,旗下「彩生活簽約管理面積總共四點八億平方米,服務二百五十個城市二千五百幾個小區;另一個「美易家」平台嘅物業管理規模亦快速擴大,六月底累計管理規模二千四百萬平方米,累計收費面積近五百二十萬平方米。

至於線上「彩之雲嘅註冊用戶已超過一千四百萬,活躍用戶都有三百八十萬,未來會致力使註冊用戶逐漸轉為活躍用戶,並進而成為消費用戶,帶動交易金額增長。彩之雲平台上半年累計交易總額達到四十四億元,推動增值服務收入增九成二至二點一億元。

今年房地產行業會更趨不明朗,但我相信花樣年憑藉分布各地嘅社區,好似一塊塊六角星互相緊扣,可以連結成穩健嘅社區服務平台,令長遠業務發展更穩定。

規模增長是花樣年過去業務發展模式,但達到一定規模之後,就不能單靠提高銷售維持增長,公司於是籌劃新發展策略以求突破。