鳴煒去哈佛

「男神」劉鳴煒這星期幫海洋公園「哈囉喂」扮鬼醫生，到處嚇人，原來佢剛從美國教書回來。這個由哈佛法律學院主辦嘅課程已辦到第五年，鳴煒每年去教三星期，由《中英聯合聲明》講起，到《基本法》訂立，一國兩制實踐都有觸及，是幾全面認識香港法治基礎嘅課程。學生來自五湖四海，有外國的也有內地和香港的，當中的互動都幾有趣。

鳴煒話在一四年佔領事件那一年開始教，那一年香港有人佔領金鐘，事情折射到美國亦有學生受影響，唔少較理想主義，會激辯香港獨立可能性，有人甚至覺得是出路，但幾年過去，佢觀察學生務實不少，知道這是不可能發生的事。至於一國兩制和基本法如何實踐，佢會舉唔同例子和學生討論，文化上、經濟上，香港如何因兩制而有優勢？或因一國帶來矛盾？鳴煒形容，課堂上的討論，一般都是「激烈而冷靜」。

有趣的是不一定外國學生就係黃絲、內地學生係藍絲，「我哋曾討論馬凱在港工作簽證不獲延期是否影響言論和新聞自由，有些外國學生唔認為係，也有內地學生認為有，所以無話因為文化差異而有前設。」

至於鳴煒自己對這些敏感話題有何個人睇法，佢就話佢嘅角色係引導學生討論，好似做調解員咁，唔需要有特定立場。

當討論到一國兩制的未來，鳴煒坦言無人預知，也很值得反思。佢覺得香港一直在變動之中。二○四七年之後會係點，受好多因素影響，那時候全球局勢如何？中國國情係點？香港在國家眼中是否仍然屬戰略性角色？都是關鍵。說到底，香港人還是要莊敬自強，保存自己的獨特性最為重要。