為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2018 年 10 月 28 日

黃竣鋒成騙徒目標

由張智霖、薛凱琪、王陽明主演嘅《蝕日風暴》, 現正喺Viu OTT平台熱播中,東姑留意到,一二年亞洲先生季軍嘅黃竣鋒,劇中有卓越嘅演出。其實,佢之前喺電影《追龍》入面飾演大反派「公仔強」已經好出色,自此更加登台、電影接唔停,戶口唔使剩番$7.94。

自小就受到李小龍嘅影響,鍾意運動同埋武術嘅黃竣鋒,喺十七歲嗰年,參加過廣東省第七屆拳擊錦標賽,仲攞埋獎添。今次喺《蝕日風暴》入面,佢一樣有好多打鬥場面,仲全部都係親身上陣。佢同東姑講拳拳到肉,完全冇用替身;而同卧底張智霖喺監獄嘅連場打鬥,佢都只係簡單用條腰封護好脊椎啫,皆因有真功夫嘛。

最近,東姑喺一個飯局撞見黃竣鋒,提起近日嘅網絡詐騙案件,佢就向東姑大呻,不過佢就唔係畀人呃而係畀人偷。原來,內地有唔少騙徒好鍾意喺佢嘅社交網偷啲型仔肌肉相,然後傳畀啲芳心寂寞嘅女士,再假扮噓寒問暖,繼而騙財。黃竣鋒向東姑展示咗一啲騙徒用佢啲相開嘅假戶口,希望唔會再有人中招,而Facebook亦因為太多佢嘅假戶口被投訴,搞到真嘅黃竣鋒戶口遭到封鎖。

黃竣鋒慨嘆咁話:「其實,我未入行之前,已經有好多騙徒偷我啲相嚟呃人。當時,我就話畀自己聽,只要我出咗名,啲騙徒就算攞我啲相嚟用,大家都只會覺得係笑話,所以我希望繼續努力,等多啲人識得我,呢啲騙局自然會少啲。」

黃竣鋒見到騙徒用自己嘅相周圍去呃人,佢慨嘆唔知可以做啲乜嘢,唯一就係努力增加自己嘅知名度,等啲騙徒知難而退。

 

社交網有多個騙徒利用黃竣鋒啲相,開假戶口去呃一啲寂寞嘅婦人,從而騙取金錢。

 

來自青島嘅單身媽媽,搵到黃竣鋒嘅真戶口,於是通知黃竣鋒,仲叫佢快啲去報警。有不法之徒利用黃竣鋒嘅肌肉相,四周圍去行騙,專呃一啲深閨渴愛嘅女士。

 

黃竣鋒食住喺電影《追龍》入面飾演大反派「公仔強」個勢,登台、電影接唔停,而搵到唔少嘅佢,半年前仲同朋友夾份開酒吧添!

 

喺熱播網劇《蝕日風暴》中,黃竣鋒同卧底張智霖鬥到你死我活;不過,大家喺鏡頭下就老友鬼鬼。